झापा, कार्तिक १२ । मंसिर ४ गते हुने निर्वाचनका लागि नेपाली कांग्रेसले चुनावी घोषणा पत्र सार्वजनिक गरेको छ । प्रदेश तथा प्रतिनिधिसभा निर्वाचनका लागि तयार गरेको घोषणा पत्र आज विहान पार्टी केन्द्रीय कार्यालयमा प्रधानमन्त्री समेत रहनु भएका काँग्रेस सभापति शेरबहादुर देउवाले सार्वजनिक गर्नु भएको हो । काँग्रेसले घोषणा पत्रलाई संकल्प पत्रको नाम दिएर सार्वजनिक गरेको हो ।
महामन्त्री विश्वप्रकाश शर्माको संयोजकत्वमा ४१ सदस्यीय घोषणा पत्र लेखन समितिले तयार पारेको घोषणा पत्र ५२ पृष्ठको रहेको महामन्त्री शर्माले जानकारी दिनु भयो ।
घोषणा पत्र सार्वजनिक कार्यक्रममा महामन्त्री शर्माले पार्टीले गर्न सक्ने कामहरुमात्रै उल्लेख गरेर घोषणा पत्र तयार पारिएको जानकारी दिनु भयो । शर्माले वीपीकालीन दस्तावेजदेखि स्थानीय तहसम्म पार्टीका तर्फबाट घोषणा गरिएको विषयवस्तुका आधारमा यो घोषणा पत्र तयार गरिएको बताउनु भयो ।
