छिल्ला केही प्रधानन्यायाधीशको अवकाश अस्वाभाविक भए जस्तै चोलेन्द्रशमशेर राणा पनि अस्वाभाविक रुपमै बिदा हुन बाध्य भएका छन् । त्यसमाथि उनी महाअभियोग प्रस्ताव नटुंगिदै । महाअभियोग प्रस्ताव नटुंगिएकाले उनी निलम्बित अवस्थामै सर्वोच्च अदालतबाट उमेर हदका कारण बिदा भएका हुन् । योपटक पनि प्रधानन्यायाधीशको स्वाभाविक अवकाश हुन पाएन । बेदाग भएर बिदा हुने चोलेन्द्रको पटक पटकको प्रयास असफल भयो ।
आउने संसदले त्यो महाभियोग प्रस्तावलाई ग्रहण गर्छ कि गर्दैन भन्ने प्रश्न एकातिर छ भने ग्रहण गरेपछि के निर्णय हुन्छ भन्ने हेर्न बाँकी छ । यदि प्रस्ताव पारित भयो भने उनले कुनै सेवा सुविधा पाउने छैनन् । तर, यो प्रस्ताव अहिलेकै अवस्थामा रह्यो भने सेवा सुविधा के हुन्छ भन्ने यकिन छैन । कतिपयले अब उनीमाथि भ्रष्टाचार मुद्दामा अख्तियार दुरुपयोग अनुसन्धान आयोगले अनुसन्धान गर्ने बाटो खुलेको पनि बताएका छन् । त्यसैले पनि चोलेन्द्र एक दिन भए पनि सर्वोच्च फर्किन चाहन्थे भन्नेहरू पनि छन् । जसका लागि उनले संसद् सचिवालयका महासचिवले दिएको पत्रलाई आधार बनाएर सर्वोच्च फर्किने प्रयास गरेका थिए ।
