पोखरा ।स्ववियु निर्वाचनको संघारमा तनहुँको बेलचौतारास्थित भानुभक्त बहुमुखी क्याम्पसमा लागेको ताला खुलेको छ।
बिहीबार क्याम्पस प्रशासन र विद्यार्थी संगठनबीच सहमति भएसँगै क्याम्पसमा लागेको ताला खुलेको हो।
गत फागुन २९ गते नेपाली कांग्रेस निकट विद्यार्थी संगठन नेविसंघ र नेकपा माओवादी केन्द्र निकट अखिल (क्रान्तिकारी)लगायतका विद्यार्थी संगठनले क्याम्पस प्रशासनमा तालाबन्दी गरेका थिए।
स्ववियु निर्वाचनमा उम्मेदवार बन्ने तयारीमा रहेका विद्यार्थीको भर्ना नै नभएको र स्ववियु निर्वाचन अवधिभर क्याम्पस बन्द हुने भएपछि भोट माग्ने अधिकारबाट वञ्चित गराएको भन्दै तालाबन्दी भएको हो।
नेकपा एमाले निकट अनेरास्ववियुले भने तालाबन्दी खोलेर निर्धारित मितिमै स्ववियु निर्वाचन गराउन क्याम्पस प्रशासनलाई दबाब दिइरहेको थियो।
तालाबन्दीकै कारण भानुभक्त बहुमुखी क्याम्पसमा स्ववियु निर्वाचन हुन सकेन। बिहीबार क्याम्पस प्रशासन र विद्यार्थी संगठनबीच ३ बुँदै सहमती भएको हो।
पठनपाठन तत्काल सुरु गर्ने, भर्ना प्रकृया सुरु गर्ने र स्ववियु निर्वाचनका लागि क्याम्पस प्रशासनले तत्काल क्याम्पस सञ्चालक समितिसमक्ष प्रस्ताव लैजाने समहती भएको अखिल (क्रान्तिकारी) भानुभक्त बहुमुखी क्याम्पस इकाइ अध्यक्ष विनिता भण्डारीले बताइन्।
