विराटनगर । कोसी प्रदेश नाम खारेजी माग गर्दै पहिचानवादी संगठनहरुले आज प्रदेश राजधानी विराटनगरमा प्रदर्शन गरिरहेका छन् ।
विराटनगरको बसपार्कबाट सुरु भएको प्रदर्शन मुख्यमन्त्री तथा मन्त्रिपरिषदको कार्यालयतिर जाने क्रममा प्रहरीले रोक्न खोज्दा झडप भएको छ ।
प्रदर्शनकारीले प्रहरीमाथि ढुंगा हानिरहेका छन् भने प्रहरीले पनि उनीहरुमाथि लाठी प्रहार गरेको छ । झडपका क्रममा केही प्रदर्शनकारी र केही प्रहरी घाइते भएका छन् । प्रदर्शनकारीलाई रोक्न प्रहरीले अश्रुग्यास प्रहार गरेको छ । यसैगरी दमकल प्रयोग गरेर प्रदर्शनकारीलाई तितरबितर पार्ने प्रयास पनि प्रहरीले गरिरहेको छ ।
प्रदेशसभाले गत फागुन १७ गते प्रदेश १ को नाम कोसी राखेको थियो । एमाले, कांग्रेस, माओवादी र राप्रपाले कोसी प्रस्ताव गरेपछि उक्त नाम प्रदेशसभाबाट भारी बहुमतले पारित भएको थियो । ९३ सदस्यीय प्रदेशसभामा कोसीको पक्षमा ८२ र विपक्षमा ४ मत परेको थियो ।
प्रदेशसभाले कोसी नामकरण गरेपछि यसको विरोधमा पहिचानवादी संगठनहरुले प्रदर्शन गर्दै आएका छन् । पहिचानका आधारमा प्रदेशको नाम राख्नुपर्ने उनीहरुको मुख्य माग छ ।
गत चैत ५ गते भएको विरोध प्रदर्शनका क्रममा सहभागी भएका संघीय लोकतान्त्रिक राष्ट्रिय मञ्चसम्बद्ध लिम्बूवान भोलेन्टियरका केन्द्रीय सहकमान्डर ४२ वर्षीय पदम लिम्बू लाजेहाङको मृत्यु भएको थियो ।
आन्दोलनरत पक्षले सुरक्षाकर्मीको लाठी प्रहारबाट लिम्बूको मृत्यु भएको दाबी गरेका छन् । प्रहरीले भने प्रहरीमाथि प्रहार गरिएको प्रदर्शनकारीको लाठी उनको टाउकामा लागेको दाबी गर्दै आएको छ ।
प्रदर्शनलाई ध्यान दिँदै विराटनगरमा ठूलो संख्यामा नेपाल र सशस्त्र प्रहरी परिचालन गरिएको छ ।
