काठमाडौँ । स्वतन्त्र विद्यार्थी युनियन चिकित्सा शास्त्र अध्ययन संस्थान (आईओएम) विरुद्ध आन्दोलनमा उत्रिएको छ । विद्यार्थीले उठान गर्दै आएका मागहरूप्रति बेवास्ता गरेको भन्दै नवनिर्वाचित स्ववियु आईओएमविरुद्ध आन्दोलनमा उत्रिएको हो ।
स्ववियुले विभिन्न १४ बुँदे माग अघि सारेको छ । महाराजगन्ज मेडिकल कलेजमा देखिएका विभिन्न समस्या सम्बोधन गर्न माग गर्दै स्ववियुलाई ज्ञापन पत्र बुझाएको हो । तर, क्याम्पस र डीनको कार्यालयले ती मागहरूप्रति बेवास्ता गरेको भन्दै आन्दोलन उत्रिनुपरेको स्ववियु सभापति आनन्द कुमार सिंहले जानकारी दिए ।
उनीहरूले आजदेखि डीनको कार्यालयमा विरोध प्रदर्शन गरेका छन् । यसअघि उनीहरूले ताला लगाएका थिए । तर, गए राति प्रहरी प्रशासनलाई बोलाएर ताला तोडिएको थियो ।
माग सम्बोधन गर्दै विद्यार्थीहरूका समस्या समाधान गर्नुको साटो प्रहरी प्रशासनलाई बोलाएर राति ताला तोड्न काम गरेको सिंहले बताए । स्ववियु निर्वाचित भइसकेपछि विद्यार्थीको हक हित र क्याम्पसको समग्र हितका लागि पहल गर्दै आएको उनको भनाई छ ।
क्याम्पस तथा आईओएमको जिम्मेवार निकायमा रहेका व्यक्तिहरूले स्ववियुसँग समन्वय गर्दै विद्यार्थीका समस्या समाधान गर्नुका साटो गैर जिम्मेवार ढङ्गबाट प्रस्तुत हुने गरेको उनको आरोप छ ।
जायज मागहरूलाई नजर अन्दाज गर्दै उल्टै विद्यार्थीहरूको पढ्न पाउने अधिकारलाई कुण्ठित पार्दै पठनपाठन अवरुद्ध गर्ने जस्ता कार्य गरिएको उनको भनाई छ ।
आन्दोलनको घोषणा गरेपछि क्याम्पसका प्राध्यापक तथा कर्मचारीहरूले समेत पठन पाठन नै रोकेका छन् । अभिभावकीय भूमिका निभाएर समाधानको बाटो खोज्नु पर्ने निकायहरू नै मुठभेडको दिशा तर्फ अग्रसर भइरहेको उनको आरोप छ ।
स्ववियुले गरेको आन्दोलनमा अनेरास्ववियुले समेत समर्थन गरेको छ ।
