रास्वपाबाहेक अरू दल तयार भएनन् सर्वदलीय बैठकका लागि

साझा परिवेश
सोमवार, बैशाख ११, २०८० १३:५७

काठमाडौं । राष्ट्रिय स्वतन्त्र पार्टी (रास्वपा)बाहेक कुनै पनि दल तयार नभएपछि चितवन–२ मा सर्वदलीय बैठक स्थगित भएको छ । अब भोलि (सोमबार) मात्र सर्वदलीय बैठक बस्ने नेताहरूले बताएका छन् ।

बैठकमा बस्न अस्वीकार गरेका रास्वपाबाहेकका दलहरूले प्रमुख जिल्ला अधिकारीबाट विभेद भएको आरोप लगाएका छन् ।

नेपाली कांग्रेसका उमेदवार जीतनारायण श्रेष्ठले आफूहरू बैठकस्थलबाट निस्किसकेको बताए । उनले प्रमुख जिल्ला अधिकारी नै सहभागी नभएपछि बैठकमा बस्न नसकिएको बताए ।

“राष्ट्रिय स्वतन्त्र पार्टीबाहेक हामी अधिकांश दल एक ठाउँमा छौँ । प्रमुख जिल्ला अधिकारी नै बैठकमा सहभागी नहुने, शान्ति सुरक्षाका एसपी नै बैठकमा सहभागी नहुने अनि होहल्ला गरेको छ, यस्तो पनि हुन्छ,“ श्रेष्ठले भने ।

नागरिक उन्मुक्ति पार्टीका उमेदवार राजेश अधिकारीले पनि निर्वाचन आचारसंहिताको उल्लंघन भएपछि समस्या आएको बताए ।
रास्वपाका सभापति रवि लामिछानेले पनि सबैजना तयार नभएपछि बैठक बस्न नसकेको बताए ।

“उहाँहरू सबैजना बैठकका तयार हुनुभएन । उहाँरूले प्रमुख जिल्ला अधिकारी, एसपी माग गर्नुभयो । अब भोलि बस्छ । आज नहुने भयो,“ उनले भने ।

सर्वदलीय बैठकको तयारी भइरहेको रास्वपाका समर्थकले नाराबाजी गरेका थिए । उनीहरूले मतगणना स्थलबाहिर नाराबाजी गरेका थिए ।

पछि रवि आफैँ पुगेर नाराबाजी नगरिदिन आग्रह गरेपछि मात्र उनीहरू शान्त बनेका थिए । उनले समर्थकको नाराबाजीले आफू अप्ठेरोमा परेको बताएका थिए ।

“तपाईंहरू मलाई माया गर्नुहुन्छ, मेरो हित चाहानुहुन्छ भने नाराबाजी नगरिदिनुहोला । नाराबाजीले मलाई धेरै समस्या पारिसक्यो,“ रविले समर्थकसँग भने ।

पहिलेदेखि असन्तुष्ट रहेका दलहरू नाराबाजीपछि झन् आक्रोशित बनेका थिए ।