काठमाडौँ। राष्ट्रपति रामचन्द्र पौडेलको छातीमा जमेको पानी निकालिएको छ। भारत नयाँ दिल्लीस्थित एम्स अस्पतालमा उपचाररत पौडेलको छातीको बायाँ भागबाट दोस्रो पटक पानी निकालिएको हो।
मंगलबार साँझ १ सय २५ एमएल पानी निकालिएको उपचारका संलग्न चिकित्सकलाई उद्धृत गर्दै भ्रमणदलका सदस्यले बताए। राष्ट्रपति पौडेलको स्वास्थ्य अवस्थामा सुधार हुँदै गएको उपचारमा संलग्न
चिकित्सकले जानकारी दिएको राष्ट्रपतिका प्रेस सल्लाहकार किरण पोखरेलले जानकारी दिए।
यसअघि जमेको पानी सुकाउन एन्टिबायोटिक चलाइएको थियो। एन्टीबायोटिकले नसुकेपछि पानी निकालिएको हो। अब बाँकी रहेको पानी औषधिले सुकाउनेमा चिकित्सकहरू आशावादी छन्।
यस हप्ताको अन्तिमतिर उनी अस्पतालबाट डिस्चार्ज हुने जानकारी प्राप्त भएको छ । हाल पौडेललाई औषधिका कारण भएका कमजोरीबाहेक अवस्था सामान्य हुँदै गएको बताइएको छ।
उनी सामान्य हिँडडुल गर्ने, कुराकानी गर्ने र खाना खाने नियमित गतिविधि गरिरहेको स्रोतले बतायो । छातीमा संक्रमण भएपछि पौडेललाई एक हप्ता अघि बुधबार बिहान श्री एयरको एयर एम्बुलेन्समार्फत् भारत लगेर उपचार थालिएको हो।
नेपालमा उपचार गराउँदा उल्लेख्य सुधार नभएको भन्दै परिवारका सदस्यहरू र चिकित्सकहरूले दिएको सल्लाहअनुसार थप उपचारका लागि पौडेललाई भारत लगिएको हो।
राष्ट्रपति पौडेलसँग निजी चिकित्सक डा. निरज बम, परिवारका सदस्य र अन्य ७ जना चिकित्सकको टोली छ।
डाइबेटिज र ग्यास्ट्रोसम्बन्धी समस्या तथा छातीमा संक्रमण भएपछि उनलाई भारत लैजानुअघि महाराजगञ्जस्थित त्रिवि शिक्षण अस्पताल भर्ना गरिएको थियो।
शिक्षण अस्पतालमा हुँदा पनि पौडेलको छातीमा जमेको पानी निकालिएको थियो।
