कास्कीको रुपा गाउँपालिकाले औषधीय गुण भएको सिप्लिगानको व्यावसायिक खेती गरेर मोडल फार्म तयार गर्ने भएको छ । रुपा गाउँपालिकाले आगामी आर्थिक वर्षमा रुपाको कम्तीमा ५०० रोपनी क्षेत्रफलमा सिल्लिगानका बिरुवा लगाउने र यसलाई मोडल फार्मको रुपमा विकास गर्ने भएको हो ।
रुपा गाउँपालिकाले बाँदर लाग्ने जमिनमा पनि लगाउन सकिने, बहुउपयोगी र राम्रो मूल्य पनि पर्ने भएकाले सिप्लिगान खेतीको व्यावसायिक प्रारम्भ गरिने अध्यक्ष नवराज ओझाले बताए ।
सिप्लिकानको मोडल र्फमको विकास गर्न व्यावसायिक खेती गर्ने र बजारीकरणको व्यवस्था पनि पालिकाले नै गर्ने छ ।रुपा गाउँपालिकाले शुक्रबार एकै दिन ल्याएको नीति तथा कार्यक्रम र बजेटल कृषिलाई प्रमुख केन्द्रमा राखेको छ ।
गाउँपालिका अध्यक्ष नवराज ओझाले नीति तथा कार्यक्रम प्रस्तुत गरेपछि उपाध्यक्ष लालसुब्बा गुरुङले आगामी आर्थिक वर्षको बजेट प्रस्तुत गरेकी थिइन् । ‘गाउँपालिकाको साथः किसानको हात’ भन्ने नाराका साथ ‘एक घर एक घार कार्यक्रम’ बृहत्तर रुपमा सञ्चालन गरिने अध्यक्ष ओझाले बताए ।
रुपाले मौरीपालनको हब बनाउने र उत्पादित महको ब्रान्डिङ गरी न्यूनतम ८ हजार लिटर मह उत्पादन गर्ने लक्ष्य राखेको छ । रुपालाई महको हब बनाउने यो कार्यक्रमका लागि पालिकाले १ करोड २० लाख रुपैयाँ विनियोजन गरेको उपाध्यक्ष गुरुङले बजेटमार्फत प्रस्तुत गरिन् ।
मौरीपालनको हब बनाउने यो कार्यक्रमका लागि मात्र पालिकाको सिंगो बजेटको १२.७० प्रतिशत विनियोजन भएको हो ।रुपा गाउँपालिकाले ल्याएको कुल ४३ करोड २९ लाख ७७ हजार रुपैयाँको बजेटमध्ये ९ अर्ब ४४ करोड, लाख ७३ पुँजीगत छ । चालुतर्फ ३३ करोड ८५ लाख रुपैयाँ छ ।
रुपा गाउँपालिका अहिले पनि मह उत्पादनका हिसाबले सम्भावनाको क्षेत्र मानिन्छ । अहिले पनि रुपा गाउँपालिकामा करिब ५-६ सय लिटर मह उत्पादन हुँदै आएको छ । अब प्रत्येक घरमा मौरी पालनका लागि प्रोत्साहन गर्ने र कम्तीमा ८ हजार लिटर मह बिक्री गर्ने लक्ष्य राखिएको ओझाको भनाइ छ ।
गाउँपालिकाले पनि मायाको चिनो तथा कोसेलीका रुपमा अतिथिलाई मह दिन संस्कारको विकाससमेत गरेको छ ।रुपाले निर्वाहमुखी कृषि प्रणालीलाई व्यावसायिक एवम् प्रतिस्पर्धात्मक कृषि प्रणालीमा रुपान्तरण गर्ने नीति लिएको छ ।
व्यावसायिक कृषि तथा पशु सेवा विकासका लागि २ करोड १० लाख रुपैयाँ विनियोजन भएको छ ।
