मिटरब्याजसम्बन्धी विधेयक फेरि राष्ट्रियसभामा पठाइँदै
साझा परिवेश
मङ्लबार, साउन २, २०८० १३:१९
मिटरब्याजसम्बन्धी विधेयक राष्ट्रियसभामा पठाइने
संशोधनमा विचार गर्ने अधिकार राष्ट्रियसभाको भएको
राष्ट्रपतिले प्रमाणित गरेर विधेयक राजपत्रमा प्रकाशितपछि
मिटरब्याजीलाई प्रहरीले पक्राउ गरेर कानुनबमोजिम कारबाही गर्ने बाटो खुल्ने
काठमाडौं ।।
प्रतिनिधिसभाबाट आइतबार सर्वसम्मतिले पारित ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८०’ लाई फेरि राष्ट्रियसभामा पठाइने भएको छ । उक्त विधेयक राष्ट्रियसभामा उत्पत्ति भई पारित भएर प्रतिनिधिसभामा आएको थियो ।
प्रतिनिधिसभाबाट त्यो विधेयक संशोधनसहित पारित गरिएको हो । प्रतिनिधिसभाबाट पारित विधेयकका संशोधन राष्ट्रियसभाले पनि विचार गर्नुपर्ने भएकाले त्यहाँ पठाउन लागिएको संघीय संसद् सचिवालयका प्रवक्ता एकराम गिरीले जानकारी दिए ।
“मिटरब्याजसम्बन्धी विधेयक राष्ट्रियसभामै उत्पत्ति भएको हो । प्रतिनिधिसभाले संशोधनसहित पारित गरेकाले उक्त संशोधनमा विचार गर्ने अधिकार राष्ट्रियसभालाई रहने हुँदा सन्देशसहित राष्ट्रियसभामा पठाउन लागिएको हो,” उनले भने ।
उनका अनुसार प्रतिनिधिसभाले गरेको संशोधन स्वीकार गरेमा राष्ट्रियसभा अध्यक्षले नै प्रमाणित गरेर विधेयक प्रमाणीकरणका लागि राष्ट्रपति रामचन्द्र पौडेलसमक्ष पठाइनेछ ।
यही विधेयकमा मिटरब्याजसम्बन्धी विषय पनि समेटिएको छ । मिटरब्याजलाई अवैध ठहर गर्ने र मिटरब्याजीलाई कानुनी दायरामा ल्याउनेसहितका ८० कानुन संशोधन गर्ने विधेयक पुनः राष्ट्रियसभाबाट पारित भएपछि मात्र प्रमाणीकरणका लागि राष्ट्रपतिसमक्ष पठाइनेछ ।
राष्ट्रपतिले प्रमाणित गरेर विधेयक राजपत्रमा प्रकाशित भएपछि मिटरब्याजीलाई प्रहरीले पक्राउ गरेर कानुनबमोजिम कारबाही गर्ने बाटो खुला हुनेछ ।
