बेचबिखनमा परेका १ हजार ६७९ को उद्धार, पुरुष पनि बेचिए
साझा परिवेश
सोमवार, अशोज १, २०८० १४:0३
काठमाडौं– प्रहरीले पछिल्लो पाँच वर्षमा नेपाललगायत विभिन्न देशबाट बेचबिखनमा परेका १ हजार ६७९ जनाको उद्धार गरिएको जनाएको छ।
आर्थिक वर्ष २०७५/७६ देखि आव २०७९/८० सम्म बेचबिखनमा परेका उनीहरुको उद्धार गरिएको नेपाल प्रहरीको मानव बेचबिखन अनुसन्धान ब्युरोको तथ्यांकले देखाएको हो।
१ हजार एक सय ३४ जनाको विभिन्न जिल्लास्थित प्रहरी कार्यालयबाट उद्धार गरिएको छ। ब्युरोकै पहलमा ५ सय ४४ जनाको उद्धार गरिएको छ। यसरी उद्धार गरिएकामध्ये १ हजार ७८ महिला तथा ६०५ पुरुष रहेको ब्युरोका प्रमुख प्रहरी वरिष्ठ उपरीक्षक जीवनकुमार श्रेष्ठले बताए।
वैदेशिक रोजगारीका नाममा मानव बेचबिखन बढ्दो रहेको उनको भनाइ छ। आर्थिक वर्ष २०७८/७९ मा बेचबिखनमा परेकामध्ये २१४ जनाको उद्धार गरिएको प्रहरी वरिष्ठ उपरीक्षक श्रेष्ठले जानकारी दिए। यस्तै, आव २०७९/८० मा तीन सय ३६ जनाको उद्धार गरिएको प्रहरीको तथ्यांक छ।
