नारायणगढ-मुग्लिन सडकमा चारवटा गाडी ठोक्किँदा १ जनाको मृत्यु, २२ घाइते
साझा परिवेश
सोमवार, जेष्ठ १४, २०८१ 0८:१९
चितवन । नारायणगढ-मुग्लिन सडकको भरतपुर महानगरपालिका-२९ मा आज मध्यराति साढे १२ बजे चारवटा गाडी एक-आपसमा ठक्कर खाँदा एक जनाको मृत्यु भएको छ । दुर्घटनामा २२ जना घाइते भएको प्रहरीले जनाएको छ ।
काठमाडौंबाट प्यूठानतर्फ जाँदै गरेको बा ४ ख ९०८६ नं. को बस, नारायणगढदेखि मुग्लिन तर्फ जाँदै गरेको ना ३ ख ७९१५ नं. को ट्रक, काठमाडौंबाट महोत्तरी बर्दिबासतर्फ जाँदै गरेको ना ७ ख ३२४८ नं.को बस र वीरगञ्जबाट काठमाडौंतर्फ जाँदै गरेको ना ६ ख ८९६८ नं.को बस एक-आपसमा ठोकिएर दुर्घटना भएको थियो ।
घाइतेहरु मध्ये अन्दाजी १७ वर्षका युवकको उपचारको क्रममा राति २ बजे चितवन मेडिकल कलेजमा मृत्यु भएको चितवन प्रहरीले जनाएको छ । घाइतेमध्ये ८ जनाको अवस्था गम्भीर रहेको छ भने १४ जनाको अवस्था मध्यम रहेको छ । १८ जनाको इच्छाकामना आधारभुत अस्पताल कुरिन्टारमा उपचार भइरहेको छ भने ४ जनाको चितवन मेडीकल कलेज भरतपुरमा उपचार भइरहेको छ ।
