नक्कली नेपाली रूपैयाँसहित दुई जना महिला काठमाडौंबाट पक्राउ
साझा परिवेश
मङ्लबार, मंसिर ५, २०८० ११:२२
नक्कली नोटको कारोबार गर्ने गरेको भन्ने सूचनाको आधारमा पक्राउ
सिर्जनाको साथबाट १ हजार दरको १ सय ४० थान र कुमारीको साथबाट १ हजार दरको २१ थान नक्कली नोट बरामद
काठमाडौं । नक्कली नेपाली रूपैयाँसहित दुई जना महिला काठमाडौंबाट पक्राउ परेका छन् ।
पक्राउ पर्नेहरूमा शंखरापुर नगरपालिका-७ कोलागाल डेरा गरी बस्ने सिन्धुपालचोक जलविरेकी ४९ वर्षीया सिर्जना थापा र बुढानिलकण्ठ नगरपालिका-१२ कपन डेरा गरी बस्ने ओखलढुंगा कुईवीर गाउँपालिका-४ की ४१ वर्षीया मैया कुमारी घिमिरे रहेका छन् । सिर्जनाको साथबाट १ हजार दरको १ सय ४० थान र कुमारीको साथबाट १ हजार दरको २१ थान नक्कली नोट बरामद भएको छ ।
सिर्जना थापा र कुमारी घिमिरेले नक्कली नोटको कारोबार गर्ने गरेको भन्ने सूचनाको आधारमा प्रहरी प्रभाग साँखु र कपनको प्रहरीले शंखरापुर नगरपालिका-७ कोलागालबाट थापालाई सोमबार राति र प्रहरी प्रभाग कपनबाट खटिएको प्रहरीले घिमिरेलाई बुढानिलकण्ठ नगरपालिका-१२ कपन, निलो माईक्रो पार्क नजिकबाट सोमबार साँझ पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।
