झापाको शिवसताक्षी नगरपालिका वडा नम्बर ८ ले हात्ती धपाउनका लागि साइरन वितरण गरेको छ । जङ्गली हात्ती रातै पिच्छे गाउँ पसेर घर भत्काउने, बाली नाली नष्ट गर्न थोलेपछि वडाले हात्ती प्रवेश गर्ने क्षेत्रका नागरिकलाई १० थान साइरन वितरण गरेको हो । जङ्गली हात्ती झिलझिलेले, डुडाँमारी र धरमपुरका राजमार्ग उत्तरबाट रातको समयमा गाउँ प्रवेश गरेर घर भत्काउने, बाली नाली नष्ट गर्न थालेपछि हात्ती धपाउन साइरन वितरण गरेको वडाध्यक्ष सन्त फेउदिनले जानकारी दिए ।
लामो समयदेखि वडा नंं ८ मा हात्तीले धेरै जनधनको क्षति गरेको कारणले जङ्गल छेउका नागरिकलाई वितरण गरिएको उनले बताए। उनका अनुसार शिवसताक्षी नगरपालिकामा हात्ती प्रवेश गर्ने क्षेत्रमा १० हेलोजि लाइटको माग गरिएको छ । तत्काल लाइन पनि वितरण गरिने उनको भनाई थियो ।
शिवसताक्षीको उत्तर जङ्गलमा हाल १० ओटा रहेको स्थानीय बासी बताउँछन् । दिनभर जङ्गलमा बस्ने र रात साँझ पर्दै गाउँतिर झिर्ने गरेकाले नागरिकले सास्ती व्यर्होदै आएका छन् । शिवसताक्षी नगरपालिकाले यस अघि नै हात्ती धपाउन टर्च लाइट र साइरन वितरण गरेको छ । नगरबासीले माग गरे अनुसार ८ थान टर्च लाइन र ८ थान साइरन वितरण गरेको शिवसताक्षी नगरपालिकाले जनाएको छ । गएको दुई महिनादेखि शिवसताक्षीको वडा नं. १, ८, ९, १० र ११ वडाका जङ्गलसँग जोडिएका क्षेत्रमा हात्तीले आतङ्क मच्याउँदै आएको छ । हालसम्म शिवसताक्षीमा मात्र जङ्गली हात्तीको आक्रमणबाट तीन जनाको ज्यान लिई सकेको शिवसताक्षी नगरपालिकाले जनाएको छ ।
