दाङ । बर्दियाबाट काठमाडौं जाँदै गरेको बस दाङमा दुर्घटना हुँदा दुई जनाको मृत्यु भएको छ ।
प्रदेश ३ ०१००५ ख ९७१९ नम्बरको यात्रुवाहक बस लमही नगरपालिका-९ रिहार नजिकै दुर्घटना हुँदा बर्दिया गेरुवा गाउँपालिका-१ का ३६ वर्षीय भीमनाथ योगी र मधुवन नगरपालिका-२ अमरपुरका युवराज चौधरीको मृत्यु भएको इलाका प्रहरी कार्यालय अमिलियाका प्रहरी निरीक्षक लाल बहादुर श्रेष्ठले जानकारी दिए ।
४७ जना यात्रु सवार बस बर्दियादेखि काठमाडौंतर्फ जाँदै गरेको बस गएराति ११ बजे दुर्घटना हुँदा बसमा सवार दुई जनाको घटनास्थलमै मृत्यु भएको हो ।
मृतकहरूको शव लमही अस्पतालमा राखिएको छ । बसको पट्टा भाँचिएर दुर्घटना भएको प्रहरीको भनाइ छ । बसको अगाडि बसेका व्यक्ति हुत्तिएर च्यापिन पुगेकाले २ जनाको मृत्यु हुन पुगेको प्रहरीले जनाएको छ ।
दुई साता अघि मात्रै दाङको भालुबाङमा पुलबाट यात्रुबाहक बस राप्ती नदीमा खस्दा १२ जनाको मृत्यु भएको थियो ।
