नेपाली काग्रेसको प्रमुख भ्रातृ संस्था नेपाल विद्यार्थी संघ
७१० जना सदस्य रहेको तदर्थ समिति सार्वजनिक
५५१ सदस्यीय तदर्थ समिति ल्याउने सहमतिलाई लत्याएको
काठमाडौं ।।
नेपाली काग्रेसको प्रमुख भ्रातृ संस्था नेपाल विद्यार्थी संघको तदर्थ समितिमा सहमति विपरीतको संख्या आएको भन्दै संस्थापनइतरले असन्तुष्टि जनाएको छ । सोमबार राति ७१० जना सदस्य रहेको तदर्थ समिति सार्वजनिक गरिएको छ । ५५१ सदस्यीय तदर्थ समिति ल्याउने सहमतिलाई संस्थापनपक्षले लत्याएको अर्को पक्षले जनाएको छ ।
५५१ जनामा ४० प्रतिशत हिस्सेदारी हुने गरि शेखर-गगन पक्षले नाम बुझाएको थियो । संख्या थपेर ७१० पुर्याउँदा समेत आफ्नो पक्षबाट दिएका कतिपय नाम हटाइएको संस्थापनइतरकी विद्यार्थी नेता प्रेमिका रानामगरले जानकारी दिइन् । ‘५५१ जनाको समितिमा ल्याउने सहमति भएर नाम दिएका हौं । हामीले पठाएका १५ जना जतिको नामहरु काटिएको छ,’ रानामगरले भनिन् ।
तदर्थ समितिमा पर्ने गरि चर्चा पाएर पनि नाम काटिएकाहरुमा पवन थापा, दीपक ओझा, सुदीप अधिकारी, सुमित बोहोरा लगायत छन् । नेता कृष्णप्रसाद सिटौला पक्षले पठाएका कतिपय नाम काटिएको सिटौला निकट एक विद्यार्थी नेताले जानकारी दिए ।
तदर्थ समितिमा विदेशमा बस्नेलाई समेत राखिएको छ । किरण भण्डारी, डा. रितेश चिमोरिया, अमृत वस्ती, रविन ढुङ्गाना लगायतका केही विदेशमा छन् । तदर्थ समितिमा राखिएपछि ढुङ्गानाले आफू समितिमा बस्न असमर्थ रहेको सामाजिक सञ्जालमा लेखेका छन् । दुई वर्षअघि नै तदर्थ समितिका लागि नाम दिएको तर अहिले राखिएको उनले बताए ।
मनोनित तदर्थ समितिमा बस्न रुचि नभए पनि नाम राखिएको भन्दै विवेक लामा घिसिङले केन्द्रीय सदस्यमा नबस्ने नबस्ने घोषणा गरेका छन् ।पार्टी सभापति शेरबहादुर देउवाले २०७८ चैत ९ मा दुजाङ शेर्पालाई संघको अध्यक्षमा मनोनित गरेका थिए । संघको कार्यसमितिलाई पटक पटक पूर्णता दिने पार्टीले निर्णय गरेपनि कार्यान्वयन गरेको थिएन । करिब १७ महिनापछि बनाइएको जम्बो टोलीमा समेत पार्टीका समूहले चित्त बुझाउन सकेका छैनन् ।
२ साउन देखि १० सम्म बसेको पार्टीको केन्द्रीय समिति बैठकले भदौ १५ सम्म सबै भ्रातृ संस्थालाई पूर्णता दिने निर्णय गरेको थियो । कार्यसमितिले पूर्णता पाएपछि ६ महिनाभित्र निर्वाचन गर्न तदर्थ समितिले कार्यादेश पाएको छ ।
