रसुवाबाट गाई काटेको आरोपमा प्रहरीले तीन जनालाई पक्राउ गरेको छ । जिल्लाको कालिका गाउँपालिका-२ काभ्रेटोलबाट मंगलबार राती ११:३५ बजे गाई काटेको भन्ने सूचनाको आधारमा पुगेको प्रहरीले तीन जनालाई पक्राउ गरेको हो ।
यसरी पक्राउ पर्नेमा सोही गाउँपालिका-२ बस्ने वर्ष ४४ को मुरली बुलुन, सोही वडाको गुम्बाटोल बस्ने वर्ष ४८ को कान्छा लामा र सोही स्थानको वर्ष ६५ को सार्की स्याङ्वा रहेको जिल्ला प्रहरी कार्यालय रसुवाले जनाएको छ ।
ईलाका प्रहरी कार्यालय कालिकास्थान प्रहरी निरीक्षक राजिव बस्नेतको कमाण्डमा खटिएको सात जनाको प्रहरी टोलीले घटनास्थलबाट गाईको मासु, एक बन्चरो र दुईवटा खुकुरी समेत बरामद गरेको जनाएको छ ।
मुलुकी अपराध संहिता २०७४ ले गाई, गोरु मार्न वा कुट्न नहुने त्यसो गरेमा अपराध गरेको ठहर गर्दै सजाय समेत तोकेको छ । संहिताको परिच्छेद २७ मा रहेको पशुपक्षी सम्वन्धि कसूरको दफा २८९ मा कसैले गाई वा गोरु मारेमा तीन वर्षसम्म कैद र कुटेर अङ्गभङ्ग पारेमा छ महिनासम्म कैद हुनेछ ।
तर कुनै गाई वा गोरुले आफ्नो वा अरुको जिउ वा ज्यानमा पुर्याउन लागेको क्षति बचाउन आवश्यक परेको कुनै काम गर्दा त्यस्तो गाई वा गोरु मर्न गएमा वा त्यस्तो गाई वा गोरुलाई कुनै चोट पुग्न गएको रहेछ भने कसूर गरेको मानिने छैन भनेर पनि सोही दफामा उल्लेख छ ।
