दुहवी । सुनसरीको दुहवी नगरपालिका २ तुथाहामा रहेको प्रिमियर स्टिल उद्योगको तेल ट्यांकीमा आगलागी भएको छ । आज बिहान ११ः ३०बजे देखी लागेको आगो नियन्त्रणमा आउन सकेको छैन । आगो नियन्त्रणमा लिन ८ वटा दमकलको सहयोगमा आगो निभाउने प्रयास जारी रहेको छ । दुहबी,इटहरी, धरान, इनरुवा, सुन्दरहरैँचा लगायतका पालिकाका दमकलहरुले निरन्तर आगो निभाउने प्रयास गरिरहेका छन् । तर ट्यांकीमा लागेको आगो केही कम हुन सकेको छैन ।
तेल ट्यांकी भएका कारण आगो निभाउन समस्या भईरहेको इलाका प्रहरी कार्यालय दुहबीका प्रहरी निरिक्षक बृद्धिराम चौलागाईले जानकारी दिए । उद्योगका २ वटा ट्यांकी मध्ये १ वटा ट्यांकीमा मात्र आगो लागेको छ । आगो लागेको ट्यांकी केही पर रहेका कारण उद्योगका अन्य ट्यांकी र मेसिनमा आगो सर्न नपाएको चौलागाईले जानकारी दिए । आगो अन्य पूर्वाधारमा सल्कीन नदिने प्रयास भईरहेको उनले बताए ।
