कर्णाली डेभलपमेन्ट बैंक प्रकरण : एगे कामीको ऋणबारे आफ्नो संलग्नता नरहेको तिलक विकको प्रस्टोक्ति

काठमाडौं । नेपालगञ्जका व्यवसायी तिलक विकले कर्णाली डेभलपमेन्ट बैंकको ऋण प्रवाहमा अनियमितताबारे
रातोपाटीमा प्रकाशित समाचारमा आफ्नो नाम मुछिएकोमा आपत्ति जनाएका छन् ।

चैत १६ मा प्रकाशित ‘बैंक कर्मचारीकै सेटिङमा गरिबलाई बोकाइयो ऋणको भारी’ र चैत १९ गते प्रकाशित
‘बोल्न र सुन्न नसक्नेको जग्गा धितो राखेर ठेकेदारले लिए ५० लाख ऋण’ शीर्षकको समाचारमा आफूलाई
अनावश्यक रुपमा मुछिएको उनको जिकिर छ ।

‘समाचारमा उल्लेख गरिएका डम्मर कामी २०७५ सालदेखि २०७७ सालसम्म मेरो चालकका रुपमा काम गरेका
र निजलाई मासिक २० हजारका दरले काम गरेको अवधिसम्मको पारिश्रमिक काम गर्दाको अवधिमा नै भुक्तानी
गरिसकिएको हो,’ उनले रातोपाटीलाई पठाएको खण्डनपत्रमा भनेका छन् ।

कामको सिलसिलामा निजलाई आफूले मोटरसाइकल किनिदिएको र मोटरसाइकल लिएर सम्पर्कविहीन भएपछि
निजकी श्रीमती र छोरीसमेत आफ्नै घरमा बस्ने भएकाले निजलाई खोजी गर्न प्रहरीको सहायता लिइ खोजी गरी
परिवारकै जिम्मा लगाएको उनको दाबी छ ।

‘चालक मेरो परिवारभित्रकै नातेदार भएको हुँदा मैले नै निजलाई बैंकबाट ऋण लिएर घर बनाउनका लागि उनकै
नाममा जग्गा खरिद गरिदिए पनि किस्ताबापतको रकम उनले पछि तिर्नेगरी मैले नै तिरिदिने गरेको थिएँ,’ उनले भनेका छन् ।

घर छोडेर गएपछि जग्गाको विषयमा छलफल गर्न बारम्बार बोलाउँदा पनि नआउने र बाहिर विभिन्न माध्यम
प्रयोग गरी आफ्नो चरित्र हत्या गर्ने गरिरहेको तिलकको आरोप छ । ‘एगे कामीको ऋणको सम्बन्धमा मेरो कुनै
संलग्नता नभएको प्रस्ट पार्न चाहन्छु,’ उनले खण्डनपत्रमा भनेका छन् ।

• संसद विघटन