काठमाडौं। पछिल्लो समय कोरोना भाइरस संक्रमितको संख्या उकालो लागेको छ। काठमाडौं उपत्यकामा ३१ जना कोरोनाका बिरामी रहेका छन्। स्वास्थ्य तथा जनसंख्या मन्त्रालयका अनुसार बुधबार दिउँसो २ बजेसम्म संस्थागत आइसोलेसनमा २१ जना भर्ना भएका छन्।
आइसीयूमा ७ जना र भेन्टिलेटरमा ३ जनाको उपचार भइरहेको मन्त्रालयले जनाएको छ। आज देशभर १०८ जना कोरोना संक्रमित थपिएका छन्। संक्रमितको संख्या बढेसँगै मृ्त्यु दर पनि बढ्न थालेको छ। मंगलबार मात्रै कोरोनाबाट दुईजनाको मृत्यु भएको थियो।
पछिल्लो समय कोरोना संक्रमण बढ्दै गएपछि मन्त्रालयले सङ्क्रमण देखिएमा सात दिनसम्म अनिवार्य आइसोलेशनमा बस्न आग्रह गरेको छ। आज विज्ञप्ति जारी गर्दै मन्त्रालयले कोरोना भाइरस सङ्क्रमणको कारणले ज्वरो र सास फेर्न कठिनाइ भएको अवस्थामा सात दिनसम्म अनिवार्य आइसोलेशनमा बस्न आग्रह गरेको हो।
सात दिनसम्म आइसोलेशनमा बसेर आठौँ दिनमा बाहिर निस्केपनि अरू मानिसको सम्पर्कमा नजान समेत मन्त्रालयले आग्रह गरेको छ। संक्रमणबाट बच्न मन्त्रालयले स्वास्थ्यका मापदण्ड अपनाउन आग्रह गरेको हो।
