उपचुनाव हुने क्षेत्रमा मतदानको बेला लामो दूरीका सवारीमात्र चलाउन पाइने
साझा परिवेश
शनिबार, बैशाख ९, २०८० १0:१४
हेटौंडा । आइतबार हुने प्रतिनिधिसभाको उपनिर्वाचनअन्तर्गत मतदानको समयमा ती क्षेत्रमा लामो दूरीका सवारीसाधनमात्र सञ्चालन हुन पाउने भएका छन् ।
बारा २, चितवन २ र तनहुँ १ मा स्थानीय रुटका सवारी साधन आवागमन बन्द गरिएको छ । तर, राजमार्ग क्षेत्रसमेत रहेका कारण यी क्षेत्रमा लामो दूरीका सवारी भने सञ्चालन हुनेछ ।
चितवनमा लामो दूरीका सवारी साधनलाई पनि समूहमा मात्रै सुरक्षा निगरानीसहित नारायणगढतर्फ पठाइने चितवन प्रशासनले जनाएको छ । प्रहरीले चितवनको सिमाना धादिङतर्फको मौवा खोला, मुग्लिन, नारायणगढको पुलचोक र गोन्द्राङ चोकमा चेकजाँच गरी केही समयको अन्तरालमा मात्रै समूहमा सवारी साधनलाई गन्तव्यमा पठाउने छ ।
चितवन प्रशासनले नारायणी पुलमा पर्नसक्ने सवारी साधनको जामको असरलाई न्यूनीकरण गर्न नवलपरासी पूर्वको गैँडाकोट क्षेत्रमा कडा चेकजाँच गरेर लामो दूरीका सवारी साधन यकिन गरेर मात्रै पठाउन सूचनामा भनिएको छ ।
तर, जिल्ला प्रशासनबाट अनुमति प्राप्त सवारी साधन, एम्बुलेन्स, स्वास्थ्यकर्मी, पत्रकारका सवारी साधन सञ्चालन गर्न पाइनेछ ।
