मधेश सरकारको ‘एक परिवार एक रोजगार’: १० करोड बजेट विनियोजन

जनकपुरधाम । मधेश सरकारले प्रदेशका यूवाहरुका लागि रोजगार सृजना तथा नविन उद्यमशिलता विकास गर्न ‘मधेश स्वरोजगार कार्यक्रम’ ल्याएको छ ।

शुक्रवार प्रदेशसभामा आगामी आर्थिक २०८०/०८१ का लागि बजेट प्रस्तुत गर्दै अर्थमन्त्री सञ्जय कुमार यादवले ‘एक परिवार एक रोजगार’ नारालाई साकार पार्न मधेश स्वरोजगार कार्यक्रम ल्याएको बताए ।

उनले मधेश स्वरोजगार कार्यक्रम सञ्चालन गर्न स्टार्टअप र सहुलियत पूर्ण ऋणसहितका लागि १० करोड रुपैयाँ विनियोजन गरेको जानकारी गराए ।

वैदेशिक रोजगारमा जाने जनशक्तिहरु दक्ष नरहेका कारणले अनेक कठिनाई र समस्या झेल्छन् । त्यसैले अब वैदेशिक रोजगारमा जाने जनशक्तिलाई सिप मूलक तालिम दिएर दक्ष बनाउने कार्यक्रमका लागि ३ करोड रुपैयाँ बिनियोजन गरेको अर्थमन्त्री यादवले बताए ।

वैदेशिक रोजगारबाट फर्केका यूवाहरुसँग भएको ज्ञान, शिप र पूँजीलाई उच्चतम उपयोग गरी उनीहरुलाई स्वदेशमै टिकाई राख्न स्वरोजगारको वातावरण निर्माण गर्न पनि सरकारले ५ करोड रुपैयाँ बजेट विनियोजन गरेको छ ।