आफ्नै महिला अनुयायीमाथि बलात्कार गरेको आरोप लागेका सिद्धबाबा भनिने विवादास्पद धर्मगुरु कृष्णबहादुर गिरीलाई जिल्ला अदालत सुनसरीले सफाइ दिएको छ ।
बुधबार न्यायाधीश हरिप्रसाद कोइरालाको इजलासले बलात्कार मुद्दामा दाबी नपुग्ने ठहर गर्दै सफाइ पाउने फैसला गरेको हो ।
जिल्ला अदालत सुनसरीका तहसिलदार भरतमणी पोखरेलका अनुसार सरकार पक्षको दाबी नपुग्ने भएका कारण सफाइ पाउने ठहर भएको बताए ।
सिद्धबाबालाई यसअघि पनि जिल्ला अदालत सुनसरीले सफाइ दिएको थियो । तर उच्च अदालतल विराटनगरले फेरि प्रमाण बुझेर फैसला गर्न भन्दै जिल्लामा नै पठाएको थियो । जिल्लाले दोस्रो पटक उनलाई सफाइ दिएको हो ।
विवादापद धर्मगुरु गिरीमाथि चतरा स्थीत आश्रममा काठमाडौँबाट आएकी महिला अनुयायीमाथि २०७६ कात्तिक ३ गते राती सिद्धबाबाले करणी गरेको आरोप थियो । २०७६ मंसिर ११ गते महिला अनुयायीले जिल्ला प्रहरी कार्यालय सुनसरीमा जाहेरी दिएकी थिइन् ।
हिरासत अवधी अस्पतालमा गुजारेका गिरीलाई १४ पुस २०७६ मा जिल्ला अदालत सुनसरीका तत्कालिन न्यायाधीश राधाकृष्ण उप्रेतीको इजलासले तीन लाख धरौटीमा पूर्पक्षका लागि छाड्ने आदेश दिएको थियो ।
आदेशपछि अस्पतालबाट आश्रम फर्किएका उनलाई ९ माघ २०७६ मा उच्च अदालत विराटनगरका तत्कालिन मुख्यन्यायाधीश तीलप्रसाद श्रेष्ठ र न्यायाधीश प्रेमराज कार्कीको इजलासले थुनामै राखेर मुद्दाको पूर्पक्ष गर्न अदेश दिएको थियो । २० फागुन २०७६ मा कारागार चलान भएका थिए ।
२२ मंसिर २०७७ मा जिल्ला अदालत सुनसरीका तत्कालिन न्यायाधीश अर्जुनप्रसाद कोइरालाको इजलासले गिरीलाई सफाई दिएको थियो । तर ३ जेठ २०७९ मा उच्च अदालत विराटनगरका कामु मुख्यन्यायाधीश सत्यमोहन जोशी थारु र किरणकुमारी गुप्ताको इजलासले जवरजस्ती करणी मुद्दामा सफाई दिने जिल्लाको फैसलामा गम्भीर त्रुटी देखाउँदै पून प्रमाण बुझेर न्याय निरुपण गर्न फैसला गरेको थियो ।
उच्चको फैसलापछि मुद्दा जिल्लामै फर्किएको मुद्दा जिल्लामा २०७९ असार १४ गते पून मुद्दा दर्ता भएको थियो । पुन दर्ता भएको मुद्दा अदालतले दाबी नपुग्ने ठहर गरेको हो ।
