अभिनेता राज कटुवाल अब फिल्म निर्माणमा समेत अगाडि बढ्ने भएका छन् । दीवाकर भट्टराईको निर्देशनमा बन्न लागेको फिल्म ‘मायावी’बाट उनले निर्माताको परिचय थप्न लागेका हुन् । फिल्ममा उनको अभिनय भने रहने छैन । निर्देशक भट्टराई र राजबीच फिल्म निर्माणमा सहकार्य हुनेछ । राजले फिल्मको कथावस्तु एकदमै मन परेकाले निर्माताको रुपमा जोडिएको जानकारी गराए ।
फिल्म ‘लाल्टिन’बाट डेब्यू गरेका उनी सन् २०१७ मा आएको फिल्म ‘लीला’पछि अभिनयबाट टाढा छन् । यस वर्ष आफ्नै निर्माणमा बन्न लागेको फिल्म ‘राजा’बाट अभिनयमा कमब्याक गर्ने उनको तयारी छ । चलचित्र विकास बोर्डको सदस्यको रुपमा कार्यकाल विताइसकेका उनले आधा दर्जन बढी म्यूजिक भिडियोमा काम गरिसकेका छन्, जसमध्ये ‘मेसो मिलाएर’ गीत हिट भएको थियो ।
असोज २ गतेबाट छायांकनमा जान लागेको ‘मायावी’मा पल शाह, दीपिका प्रसाईं, सुशील सिटौला र मोडल समिम खानको मुख्य भूमिका रहनेछ । समिमले यही फिल्मबाट डेब्यू गर्न लागेका हुन् । फिल्ममा निर्देशक भट्टराई स्वयंको लेखन छ । क्रिएटिभ सिने आर्टसको ब्यानरमा निर्माण हुने फिल्ममा एसडी योगीको संगीत, राम अविरल विष्टको गीत, राजुविक्रम थापाको डिओपी रहनेछ ।
