हमासका बन्धक छुटाउन कतारको पहल, विपिनका लागि के गर्दैछ सरकार?

हमास-इजरायल संघर्ष सुरु भएको एक महिना बितिसकेको छ। इजराइली बमबारीमा मर्नेको संख्या १० हजार ५६९ पुगिसकेको छ। यसमा ४ हजार ३२४ बालबालिका छन्।

यसबीचमा युद्धविरामको पहल पनि भइरहेको छ। पछिल्ला २४ घण्टामा युद्धविरामको ठोस पहल भएको छ।

हमासले बन्धक बनाएका दुई सयभन्दा बढी मानिस छुटाउन भइरहेको वार्तामा राष्ट्रसंघ पनि सामेल रहेको महासचिव एन्टोनियो गुटेरेसले बताएका छन्।

रोयटर्ससँग उनले भनेका छन्, ‘बन्धकलाई छुटाउन हरसम्भव मद्दत गर्नु हाम्रो जिम्मेवारी हो।’ उनका अनुसार यस विषयमा कतारले सकारात्मक भूमिका निभाइरहेको छ र राष्ट्रसंघ उसको सम्पर्कमा छ। साथै इजरालयसँग पनि राष्ट्रस‌ंघ संवादमै छ।

इजरायली प्रधानमन्त्री बेन्जामिन नेतान्याहूका सल्लाहकार मार्क रेगेवले भनेका छन्- रफाह क्रसिङको नजिक दक्षिणी गाजामा भूमध्य सागरसँग जोडिएको इलाकामा सेफ जोन बनाउने विषयमा छलफल भइरहेको छ। त्यहाँ फिल्ड हस्पिटल पनि हुनेछ।

बुधबार इजरायली सेनाले उत्तरी गाजाका मानिसलाई त्यहाँबाट निस्किने सुरक्षित बाटो दिनका लागि बमबारीमा पहिलोपटक अल्पविराम (पज) गरेको थियो।

उता टोकियोमा भइरहेको जी-७ देशको बैठकले गाजामा उत्पन्न मानवीय संकटलाई लिएर तुरुन्त कदम चाल्न जोड दिएको छ। विश्व समुदायले समेत युद्धविरामका लागि आवाज उठाइरहेको छ।

विपिन छुटाउन के गर्दैछ सरकार ?
हमासले एक महिनादेखि गाजा क्षेत्रमा बन्धक बनाएकामा नेपालका विपिन जोशी पनि छन्। उनलाई मुक्त गराउन परराष्ट्र मन्त्रालयले गरेको पहल परिणाममुखी बन्न सकेको छैन। गत असोज २० (अक्टोबर ७) मा हमासले इजरायलको दक्षिणी क्षेत्र किबुज अलुमिममा १० जना नेपालीको हत्या गरी विपिनलाई बन्धक बनाएर लगेको थियो।

परराष्ट्र मन्त्रालयले जोशीलाई छुटाउन इजरायल, कतार, अमेरिका र इन्टरनेसनल फेडेरेसन अफ रेडक्रस (आईएफआरसी) सँग समन्वय गरिरहेको जनाएको छ। सबैभन्दा पहिले जोशीलाई छुटाउन हमाससँग लडिरहेको इजरायललाई नै पहल गर्न आग्रह गरिएको थियो। त्यसपछि अक्टोबर १५ मा परराष्ट्रमन्त्री एनपी साउदले कतारका राज्यमन्त्री मोहम्मद बिन अब्दुलाजिजसँगको टेलिफोन कुराकानीमा जोशीको खोजीका लागि अनुरोध गरेका थिए।

कतारलाई अनुरोध गरे पनि सकारात्मक नतिजा ननिस्किएपछि नेपालले गाजासहित प्यालेस्टाइन क्षेत्रमा मानवीय सहायताको काम गर्दै आएको आईएफआरसीसँग समन्वय गरेको थियो। अघिल्लो साता अमेरिका भ्रमण क्रममा परराष्ट्रमन्त्री साउदले अमेरिकाले आफ्ना नागरिकको उद्धार गर्दा जोशीलाई पनि ल्याउन आग्रह गरेका थिए। कात्तिक १४ मा साउद र अमेरिकी विदेशमन्त्री एन्टोनी ब्लिन्केनबीच द्विपक्षीय भेटवार्ता भएको थियो। त्यही भेटमा उनले जोशीको उद्धारका लागि सहजीकरण गरिदिन आग्रह गरेका थिए।

संयुक्त राष्ट्रसंघमा भएको युद्धविरामसम्बन्धी प्रस्तावमा भएको मतदानमा नेपाल पनि युद्धविरामको पक्षमा उभिएको थियो। तर, इजरायलका प्रधानमन्त्री बेन्जामिन नेतान्याहुले बन्धकलाई मुक्त नभएसम्म युद्धविराम नहुने अडान दोहोर्‍याएका छन्।

• संसद विघटन