चार देशीय महिला टी–२० शृङखलाको दोस्रो खेलमा नेपालले आज घरेलु टोली हङकङसँग खेल्दै
साझा परिवेश
बिहिबार, कार्तिक ३०, २०८० 0८:0४
काठमाण्डौ – चार देशीय महिला टी–२० शृङखलाको आफ्नो दोस्रो खेलमा नेपालले आज घरेलु टोली हङकङसँग खेल्दैछ । यो खेल बिहान पौने १२ बजे शुरु हुनेछ । हिजो भएको पहिलो खेलमा नेपाल तान्जानियासँग २७ रनले पराजित भएको थियो । हङकङले जापानलाई हराएको थियो ।
हङकङमा भैरहेको प्रतियोगितामा आयोजक टोलीसँगै नेपाल, तान्जानिया र जापान छन् । आईसीसीको बरियतामा तान्जानिया १९ औँ स्थानमा छ भने नेपाल २१ औँ स्थानमा छ । यस्तै वरियतामा हङकङ २२ औँ तथा जापान ५१ औँ स्थानमा रहेको छ ।
नेपालले समूह चरणको अन्तिम खेल पर्सि मंसिर २ गते जापानसँग खेल्ने छ । शीर्ष दुई टोलीले उपाधिका लागि खेल्ने छन् । नेपाली टोलीमा कप्तान इन्दु बर्मा, उपकप्तान बिन्दु रावल, रुविना क्षेत्री, सीता रानामगर, अस्मिना कर्माचार्य, काजोल श्रेष्ठ, कञ्चन श्रेष्ठ, खुसी डङ्गोल, सङ्गीता राई, सोनी पाख्रिन, सोमु विष्ट, पूजा महतो, रोमा थापा र सम्झना खड्का छन् । नेपाली महिला क्रिकेट टोलीको प्रशिक्षकमा मनोज कटुवाल रहेका छन् ।
