धनगढी । कैलालीको धनगढी मेनरोडस्थित सारथी अस्पतालमा भीषण आगलागी भएको छ । अहिले आगो नियन्त्रण लिइसकिएको अवस्था छ ।
धनगढी उपमहानगर-१ स्थित उक्त अस्पतालमा गएराति झन्डै १ बजेतिर आगलागी भएको हो । १५ शय्या र ४ आईसीयू रहेको अस्पतालमा १ जना बिरामी भर्ना भएका थिए । समयमै बिरामीको उद्दार गरिएकोले मानवीय क्षति हुन नपाएपनि उपकरणसहित भौतिक सामग्रीहरू जलेर नष्ट भएका छन् ।
आगलागी भएको जानकारी प्राप्त हुनासाथ जिप्रका कैलालीबाट ४० जना, तेघरी ब्यारेक कैलालीबाट २६ जना, शसस्त्र प्रहरी बल ३४ नम्बर गण हेडक्वाटर कैलाली नैनादेवीबाट ३० जना र दमकलसहित महनगरप्रहरीको टोली आगो नियन्त्रणमा खटिएको हो ।
अस्पतालमा रहेका बिरामीलाई नजिकै रहेको सेती प्राविधिक अस्पतालमा सारिएको छ । आगलागीबाट भएको क्षतिको यकिन विवरण आई नसकेको भएपनि त्यहाँ रहेका एक्सरे मेसिन, यूएसजी, ईको र फर्निचरहरू सबै जलेको अस्पतालका प्रबन्ध निर्देशक वेदप्रकाश जोशीले जानकारी दिए ।
उनका अनुसार बचेका केही सामग्री आगो नियन्त्रणमा खटिएका सुरक्षाकर्मीहरूले बाहिर सारेर जोगाएका छन् । अस्पताल नजिकैको जुत्ता चप्पलको होलसेलको गोदाममा अचानक विद्युत् तार सर्ट भई आगलागी भएको प्रहरी कार्यालय कैलालीले जनाएको छ ।
खाद्य व्यवस्था तथा व्यापार कम्पनीको गोदाम भाडामा लिएर अस्पताल सञ्चालन गरिएको थियो । अस्पताल नजिकैका केही व्यापारिक गोदामहरूमा पनि आगलागीबाट क्षति भएको प्रहरीले जनाएको छ ।
