मुख्यमन्त्रीले शुभकामना वक्तव्यमा कोशी प्रदेश नलेख्दा …

• मुख्यमन्त्रीको शुभकामनामा प्रदेशको नाम नै गायब !
• एमाले निकट नेता, कार्यकर्ताहरुको व्यापक आलोचना
• यो प्राविधिक त्रुटी मात्रै हो

विराटनगर । कोशी प्रदेशका मुख्यमन्त्री केदार कार्कीले तमु ल्होसारको शुभकामना वक्तव्यमा ‘कोशी’ नाम उल्लेख नगरेको भन्दै व्यापक आलोचना सुरु भएको छ । कोशी नामको विषयमा असन्तुष्टि जनाउँदै आएका पहिचानवादीहरुले भने कार्कीको प्रशंसा गरेका छन् ।

मुख्यमन्त्री कार्कीले जारी गरेको शुभकामना वक्तव्यमा देब्रेपट्टि ‘मुख्यमन्त्री’ र दाहिने पट्टि ‘विराटनगर नेपाल’ उल्लेख गरेका छन् । हस्ताक्षर गरेको स्थानमा पनि ‘केदार कार्की, मुख्यमन्त्री’ लेखिएको छ । वक्तव्यमा उल्लेखित शुभकामना सन्देशहरुमा कोशी शब्द कतै पनि उल्लेख छैन ।

उक्त विषयमा एमाले निकट नेता, कार्यकर्ताहरुले व्यापक आलोचना गरिरहेका छन् । उता, पहिचानवादी नेता अर्जुन जम्नेली राईले भने प्रशंसा गर्दै केही शब्द खर्चिएका छन्, ‘हो यस्तो कोशी शब्द बिनाको शुभकामना मात्रै स्वीकार्य हुन्छ । धन्यवाद मुख्यमन्त्री कार्यालयलाई । कोही कोशी नाम मात्र स्थापित गर्न चाहन्छन् भने ती विखण्डनकारी, नश्लवालीहरु हुन ।’

यता, मुख्यमन्त्री कार्यालयका प्रेस सल्लाहकार देवनारायण साहले भने प्राविधिक कमजोरीका कारण यस्तो भएको र नियत कोशी लेख्ने नभएको बताएका छन् । ‘हामीले सच्याइसकेका छौं । यो प्राविधिक त्रुटी मात्रै हो,’ उनले भने । मुख्यमन्त्री कार्यालयले उक्त शुभकामना सन्देशको ठाउँमा कोशी नाम रहेको वक्तव्य रिप्लेस गरिसकेको साहले बताए । पछिल्लो पटक जारी गरिएको शुभकामना सन्देशको दाहिने पट्टि भने कोशी, प्रदेश विराटनगर नेपाल उल्लेख गरिएको छ । उक्त वक्तव्य एक घण्टापछि सच्याएर जारी गरिएको हो ।

• संसद विघटन