क्रान्तिको स्वरुप फेरिएको हो, सकिएको होइन : प्रधानमन्त्री प्रचण्ड

काठमाडौँ — प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहालले जनयुद्धको शान्तिपूर्ण रूपान्तरणसँगै क्रान्तिको स्वरूप फेरिएको बताएका छन् । बिहीबार दिउँसो रामेछापको बेथान पानीघाटमा आयोजित २७ औँ बेथान वीरता दिवस, शहिद स्तम्भ उद्घाटन तथा शहिद परिवार सम्मान कार्यक्रममा प्रधानमन्त्री दाहालले क्रान्ति अझै बाँकी रहेको, तर क्रान्तिको स्वरुप भने फेरिएको बताए ।

‘जनयुद्ध देशको मुक्ति र परिवर्तनका निम्ति महान् विद्रोह थियो। त्यतिबेला हामीसँग ठूलो शक्ति थिएन, तर महान् विचार थियो, ऐतिहासिक लक्ष्य थियो। त्यसका आधारमा नेपालको क्रान्तिले गुणात्मक उचाइ प्राप्त गर्‍यो। त्यसले नै देशमा महान् परिवर्तन सम्भव भएको हो,’ उनले भने, ‘हामी अहिले पनि क्रान्तिमै छौं । क्रान्ति सकिएको छैन, तर क्रान्तिको स्वरूप फेरिएको छ ।’

प्रधानमन्त्री दाहालले समाजवाद प्राप्तिका लागि अहिले सामाजिक न्याय, सुशासन र संमृद्धिका प्राथमिकताहरुसहित अघि बढिहरेको बताए । ‘हामी समाजवादको लक्ष्यमा छौं। त्यसका निम्ति सामाजिक न्याय, सुशासन र समृद्धिको प्राथमिकतासहित अगाडि बढिरहेका छौं। यो पनि क्रान्तिको शान्तिपूर्ण मोर्चा हो,’ प्रधानमन्त्री दाहालले भने ।

उनले वर्तमान सरकारले देश र जनताको हितलाई केन्द्रमा राखेर काम गरिरहेको बताए । उनले भारतीय विदेशमन्त्रीको नेपाल भ्रमणले १० हजार मेगावाट विद्युत निर्यातको ग्यारेण्टी गर्न लागेको समेत जानकारी दिए ।

• संसद विघटन