कोशी प्रदेशमा फागुन २९ देखि प्रादेशिक ललितकला प्रदर्शनी हुने ; प्रदर्शनीमा कलाकार र कलाकृतिहरुको ओइरो

नवीन गर्तौला / इटहरी÷कोशी प्रदेशको इटहरीमा आगामी फागुन २९ गतेदेखि चैत्र ३ गतेसम्म प्रादेशिक ललितकला प्रदर्शनी–२०८० आयोजना गरिने मूल आयोजक समितिका संयोजक तथा नेपाल ललितकला प्रज्ञा प्रतिष्ठानका प्राज्ञ सञ्जय बान्तवा राईले जानकारी दिए ।

सुनसरीको इटहरी मेट्रिक्स परिसरमा आज शुक्रबार सम्पन्न प्रेस मिटमा राईले सो जानकारी दिएका हुन । प्रदर्शनी नेपाल ललितकला प्रज्ञा प्रतिगठानको आयोजना, इटहरी उपमहानगरपालिकाको सहकार्य र इटहरी मेट्रिक्सको स्थानीय व्यवस्थापनमा हुन लागेको हो ।

प्राज्ञ राईले प्रादेशिक ललितकला प्रदर्शनी–२०८० मा ललितकलाअन्तर्गतका चित्रकला, मूर्तिकला, लोककला, हस्तकला, वस्तुकलाका साथै अन्य सृजनात्मक कलाका विधासम्बन्धित कलाकृतिहरुलाई समावेश गरिने बताउँदै अन्य सिर्जनात्मक कलातर्फ छविकला, भिडियो आर्ट, प्रतिस्थापन कला, भावभङ्गिमा कला, कार्टुन, क्यारिकेचर, पोष्टर र डिजिटल कलासमेत प्रदर्शनीमा समावेश गरिने अवगत गराए ।

उनका अनुसार प्रदर्शनीमा समावेश भएका कलाकृतिहरुमध्येबाट प्रतिष्ठानको नियम र मापदण्डका आधारमा निश्चित कलाकृतिहरुलाई विज्ञहरुको टोलीबाट छनौट गरी राष्ट्रिय ललिलतकला प्रतियोगितामा पठाइने छ । राष्ट्रिय प्रदर्शनीमा समावेश कलाकृतिहरुमध्ये उत्कृष्ट ठहर भएका कलाकृतिहरुलाई सर्वोत्कृष्ट राष्ट्रिय ललितकला पुरस्कार, ललितकला विधागत पुरस्कार र उत्कृष्ट विद्यार्थी ललितकला पुरस्कार गरी तीन वर्गीकरणमा पुरस्कृत गरिने छ ।

स्थानीय व्यवस्थापनको जिम्मा पाएको इटहरी मेट्रिक्सका अध्यक्ष विक्रमश्रीले प्रादेशिक ललितकला प्रदर्शनी–२०८० का लागि हालसम्म १ सय ४७ जनाले सहाभागिता फारम भरिसकेको जानकारी दिए । उहाका अनुसार ५८ जना चित्रकारका १२१ चित्रकला, ३६ जना मूर्तिकारका ४१ मूर्तिकला, २५ वटा लोककला, १५ वटा वास्तुकला, १२ वटा छविचित्र, २ वटा भिडियो आर्ट, २ वटा पर्फमिङ आर्ट र ५ वटा प्रतिस्थापन कला रहेका छन् ।

मूल आयोजक समितिका सहसंयोजकसमेत रहनुभएका वरिष्ठ कलाकर्मी विक्रमश्रीले हाल प्रदर्शनीका लागि आफ्नै पहलमा आयोजना स्थलको सौन्दर्यीकरण गर्ने र कलाकृतिहरुको डिस्प्ले गर्ने स्थलको निर्माण गर्ने कार्य अन्तिम चरणमा पुगेको पनि जानकारी दिए।

आयोजक समितिले प्रदर्शनीका लागि ३५ लाख बजेट लाग्ने जानकारी दिँदै ललितकलाको दृष्टिले बागमतिपछि देशको दोस्रो अग्रणी स्थानमा रहेको कोशी प्रदेशको प्रदर्शनीमा कलाकृतिहरु र कलाकारहरुको सहभागिता उत्साहजनक देखिएको जनाएको छ । प्रादेशिक ललितकला प्रदर्शनीले कोशी प्रदेशलाई देशको कलाक्षेत्रमा उर्वरभूमिको रुपमा उभ्याउने विश्वास लिन सकिने आयोजक समितिको भनाइ रहेको थियो ।

• संसद विघटन