बिर्तामोड । नेपाल कम्युनिस्ट पार्टी (एमाले) झापाको ११ औं जिल्ला अधिवेशनबाट सर्वसम्मत चयन भएको १४९ सदस्यीय कमिटीले शपथग्रहण गरेको छ ।
जिल्ला पार्टी कार्यालय बिर्तामोडमा हिजो आयोजित कमिटी घोषणा तथा शपथग्रहण कार्यक्रममा पदाधिकारी, सदस्यहरू र लेखा समितिका पदाधिकारी सदस्यहरूले शपथग्रहण गरेका हुन् । उनीहरूलाई निर्वाचन अधिकृत टङ्क दंगालले शपथ गराएका छन् ।
निर्वाचन अधिकृत टङ्क दंगालले पार्टीको ११औँ जिल्ला अधिवेशनबाट अध्यक्षमा प्रेम बहादुर गिरीसहित सबै पदमा निर्विरोध निर्वाचित १४९ सदस्यीय कमिटीको घोषणा घोषणा गरेका थिए । उपाध्यक्षमा शिव ढुङ्गेल, सचिवमा तुलसी कार्की, उपसचिवमा असारु राजवंशी र अनिता कन्दङवा निर्विरोध निर्वाचित भएको घोषणा गरिएको छ ।
पाँच पदाधिकारी , १५ वटा पालिकाबाट एक सय १०, खुला सदस्य १५, आदिवासी जनजातिबाट पाँच, दलितबाट पाँच, अल्पसङ्ख्यक मधेसीबाट तीन, मजदुरबाट पाँच र अपाङ्गबाट एक गरी एक सय ४९ जना सर्वसम्मत चयन भएका हुन् । १० प्रतिशतलाई पार्टीको पहिलो बैठकले मनोनीत गर्ने छ ।
घोषणा तथा शपथ ग्रहण कार्यक्रममा नेताहरु हिक्मत कार्की, विशाल भट्टराई, देवेन्द्र दाहाल, रविन कोइराला, रोमनाथ ओली, जसमाया जगमेर, इन्द्र भण्डारी, मेनुका काफ्ले, जल वर्षा राजवंशी लगायतले मन्तव्य राखेका थिए । अधिकांश नेताहरूले झापाले सर्वसम्मत गरेर देश व्यापारी सकारात्मक सन्देश दिएको बताएका थिए । झापामा सर्वसम्मत गरेर एकताको सन्देश दिएको नेताहरूको भनाई थियो ।नवनिर्वाचित अध्यक्ष गिरीले प्रतिबद्धता मन्तव्य राख्दै जनताको आँत हाँस्ने गरी काम गर्न जिल्ला कमिटी जिम्मेवार पूर्वक लाग्ने बताए ।
