कतारका राजा नेपालमा, विमानस्थलमा राष्ट्रपति पौडेलद्वारा स्वागत

काठमाडौं । राष्ट्रपति रामचन्द्र पौडेलको निमन्त्रणामा कतारका राजा शेख तमिम बिन हमाद अल थानीलाई नेपाल आइपुग्नुभएको छ । उहाँलाई राष्ट्रपति पौडेलले त्रिभुवन विमानस्थलमै पुगेर स्वागत गर्नुभएको छ ।

उहाँको सम्मानस्वरुप नेपाली सेनाले २१ तोपको सलामी दिएको छ । परराष्ट्र मन्त्रालयका अनुसार राजकीय दुईदिने भ्रमणका लागि नेपाल आउनुभएका कतारी राजा थानीसँग राष्ट्रपति पौडेलको औपचारिक भेट भने शीतलनिवासमै हुनेछ ।

कतारी राजाको सम्मानमा राष्ट्रपति पौडेलले आज राजकीय भोजको आयोजनासमेत गर्नुभएको छ । कतारी राजा पहिलोपटक नेपाल भ्रमणमा आउनुभएको हो ।

कतारी राजाको नेपाल भ्रमणका क्रममा सम्मानस्वरुप सरकारले आज देशभर सार्वजनिक बिदासमेत दिएको छ ।

सिंहदरबारमा हिजो (सोमबार) बसेको मन्त्रीपरिषद् बैठकले सार्वजनिक बिदा दिने निर्णय गरेको सरकारका प्रवक्ता रेखा शर्माले जानकारी दिनुभयो ।

प्रधानमन्त्री पुष्पकमल दाहालसँग पनि कतारी राजाले आजै द्विपक्षीय भेटवार्ता गर्ने कार्यक्रम छ । भेटका क्रममा द्विपक्षीय सम्झौता र समझदारीपत्रमा हस्ताक्षर गर्ने कार्यक्रम तय छ ।

कतारी राजा भोलि (बुधबार) नेपाल भ्रमण सकेर स्वदेश फर्कने कार्यतालिका छ ।

कतारका राजाको भ्रमणका क्रममा नेपाल सरकारले कतारलाई दुईवटा हात्ती उपहार दिनेसमेत तयारी गरेको छ ।

• संसद विघटन