चावहिलबाट १ पुरुष ‘अपहरण’ गरेर बन्धक बनाएको खुलाशा
साझा परिवेश
आइतवार, पुस १५, २०८० १३:१७
हिस्सीखायाँ तामाङ ‘अपहरण’ मा परेको खुलाशा
अपहरणमा संलग्न आरोपमा चारजना नियन्त्रणमा
पक्राउ परेकामाथि थप अनुसन्धान जारी
काठमाडौं ।।
काठमाडौंको चावहिलबाट रसुवाका हिस्सीखायाँ तामाङ ‘अपहरण’ मा परेको खुलेको छ । एक महिनाअघि नै उनले आफू अपहरणमा परेको उजुरी दिएपछि काठमाडौं प्रहरीले अनुसन्धान थालेको थियो ।अनुसन्धानका क्रममा उनी अपहरणमा परेको खुलेको प्रहरीले जनाएको छ । शनिबार र आइतबार (हिजो र आज) गरी प्रहरीले तामाङको अपहरणमा संलग्न आरोपमा चारजनालाई नियन्त्रणमा लिएको छ ।
चार युवाले तामाङलाई आफूहरू प्रहरी भएको भन्दै चाबेलबाट काठमाडौंकै गागलफेदीको एक रेस्टुरेन्टमा पुर्याएर बन्धक बनाएको खुलेको प्रहरीले जनाएको छ । प्रहरीका अनुसार, उनलाई बन्धक बनाएर १३ लाख ५० हजार रुपैयाँ फिरौती लिइएको थियो । तामाङले चिनियाँ नाका रसुवा क्षेत्रमा दोभासेको काम गर्ने गरेको प्रहरीले जनाएको छ । पक्राउ परेकामाथि प्रहरीले थप अनुसन्धान जारी राखेको छ ।
