प्रतिनिधिसभा बैठक बस्दै, गृहमन्त्री लामिछाने राेष्टममा जाने कार्यसूची हटाइयाे

प्रतिनिधिसभाको बैठक आज (शुक्रबार) बस्दैछ।

बैठक नयाँ बानेश्वरस्थित संघीय संसद भवनमा बिहान ११ बजे बस्नेछ। बिहीबार भएको बैठक प्रमुख प्रतिपक्षी नेपाली कांग्रेसको अवरोधका कारण स्थगित भएको थियो। सभामुखले जबरजस्ती बैठक संचालन गर्न खोजेपछि बिहीबारको बैठकमा तनावसमेत उत्पन्न भएको थियो। कांग्रेसले सहकारी ठगी प्रकरणमा संसदीय समितिको माग राख्दै संसदको अवरोध जारी राख्ने बताएको छ। आजकाे बैठकका लागि संसद सचिवालयले ६ वटा कार्यसूची तय गरेकाे छ।

सभामुख देवराज घिमिरेले प्रधानमन्त्री तथा मन्त्रिपरिषद्काे कार्यालयबाट प्राप्त कार्यभारसम्बन्धी पत्रकाे व्यहाेरा पढेर सुनाउने कार्यक्रम रहेकाे छ। भने, प्रधानमन्त्री पुष्पकमल दाहाल प्रचण्डले राष्ट्रपतिले प्रस्तुत गरेकाे सम्बाेधन टेबुल गर्ने कार्यसूची रहेकाे छ।

त्यस्तै सभामुखबाट प्रतिनिधिसभा नियमावली, २०७९ काे नियम १० बमाेजिम बैठककाे अध्यक्षता गर्न सदस्यहरु मनाेनयन गर्न कार्यसूची पनि रहेकाे छ। त्यस्तै सभामुख धिमिरेले धन्यवादकाे प्रस्ताव प्रस्तुत गर्ने कार्यसूची पनि रहेकाे संसद सचिवालयले जनाएकाे छ।

उद्याेग वाणिज्य तथा आपूर्तिमन्त्री दामाेदर भण्डारीले ‘लगानी सहजीकरणसम्बन्धी केही नेपाल ऐनलाई संशाेधन गर्ने अध्यादेश, २०८१’ पेस गर्ने कार्यसूची रहेकाे छ। त्यसैगरी ऊर्जा जलस्राेत तथा सिँचाइमन्त्री शक्तिबहादुर बस्नेतले ‘अन्तर्राष्ट्रिय साैर्य गठबन्धन स्थापनासँग सम्बन्धित सम्झाैताकाे प्रावधानमाथि संसदमा छलफल गरियाेस्’ भन्ने तथा ‘अन्तर्राष्ट्रिय साैर्य गठबन्धन स्थापनासँग सम्बन्धित सम्झाैतालाई अनुमाेदन गरियाेस्’ भन्ने प्रस्ताव प्रस्तुत गर्ने कार्यसूची रहेकाे महासचिव पद्मप्रसाद पाण्डेयले जानकारी दिए।

संसद सचिवालयले बिहीबारकाे कार्यसूचीमा रहेकाे उपप्रधानमन्त्री एवम् गृहमन्त्री रबि लामिछानेले ‘राजनीतिक दलसम्बन्धी (दोस्रो संशोधन) विधेयक, २०८० माथि विचार गरियोस्’ भन्ने प्रस्ताव प्रस्तुत गर्ने कार्यसूची हटाएकाे छ।

• संसद विघटन