ताप्लेजुङको पाथीभरा क्षेत्रमा निर्माण भइरहेको केबलकार यथास्थितिमा राख्न सर्वोच्च अदालतल आदेश दिएको छ। योसँगै अब केबलबार निर्माण कार्य तत्कालका लागी स्थगित भएको छ। न्यायाधीश शारंगा सुवेदीको एकल इजलासले हालसम्म भएका सबै निर्माण कार्य यथास्थितिमा राख्न आदेश दिएको हो। यो आदेश यामबहादुर लिम्बू लगायतका निवेदकहरूले दायर गरेको रिटपछि आएको हो। उनीहरूले केबलकार निर्माण धार्मिक–सांस्कृतिक सम्पदामाथि अतिक्रमण भएको दाबी गर्दै अन्तरिम आदेशको माग गरेका थिए। अदालतले तत्काल अन्तरिम आदेश दिने वा नदिनेबारे थप छलफल आवश्यक रहेको भन्दै चैत २६ गते दुबै पक्षलाई उपस्थित हुन भनेको छ। पाथीभरामा उद्योगी चन्द्र ढकालको कम्पनीले केबलकार निर्माण गरिरहेको छ। तर, स्थानीय समुदाय यसको विरोधमा उत्रिएका छन्। उनीहरूको दाबी छ कि यो परियोजनाले धार्मिक तथा सांस्कृतिक महत्व बोकेको क्षेत्रलाई असर पु¥याउनेछ।
