राष्ट्रिय विभूति पासाङ ल्हामु शेर्पाको ३० औँ स्मृति दिवस

काठमाडौँ । राष्ट्रिय विभूति पासाङ ल्हामु शेर्पाको ३० औँ स्मृति दिवस मनाइएको छ । काठमाडौँसहित देशभरका विभिन्न स्थानमा आज ३० औँ पासाङ ल्हामु स्मृति दिवस मनाइएको हो ।

काठमाडौँको चुच्चेपाटीस्थित पासाङ ल्हामु शेर्पाको सालिकमा माल्यार्पण र पुष्प गुच्छा अर्पण गरी ३० औँ स्मृति दिवस मनाइएको छ । स्मृति दिवसको अवसरमा पासाङ ल्हामु प्रतिष्ठानकी अध्यक्ष समेत रहेकी राष्ट्रिय विभूति शेर्पाकी छोरी आङ फुटी शेर्पाले सालिकमा माल्यार्पण र पुष्प गुच्छा अर्पण गर्दै संसारभरका महिलाका लागि पासाङ ल्हामु प्रेरणाको श्रोत भएको बताइन् । उनले फाउन्डेसनको तर्फबाट पनि हिमाल आरोहणको चाहना राख्ने महिलालाई आवश्यक सहयोग गरिरहेको र राज्यले पनि यस्ता सहयोगका कार्यमा थप अग्रसरता देखाउन आवश्यक रहेको बताइन् । उनले सरकारले देशमा नै हिमाल आरोहीलाई सम्मान गर्नुपर्ने बताइन् ।

त्यस्तै पासाङ ल्हामु प्रतिष्ठानकी वरिष्ठ उपाध्यक्ष लाक्पा फुटी शेर्पाले पासाङ ल्हामु शेर्पाका सपनाहरू आज आएर साकार भइरहेको देख्न पाउँदा खुसी लागेको बताइन् । उनले पासाङ ल्हामु शेर्पाले देशका लागि केही गर्छु भन्ने भोक रहेको र उहाँको आत्मविश्वासलाई देखेर नै आजका महिलाहरूमा थप काम गर्ने इच्छा, चाहना र प्रेरणा प्राप्त भइरहेको बताइन् ।

त्यस्तै पूर्वमन्त्री कृपाशुर शेर्पाले पासाङ ल्हामु शेर्पाको स्मृति दिवस इज्जत, प्रतिष्ठा र गौरवको रुपमा मनाइएको बताए । उनले शेर्पाको जीवनीले नयाँ पुस्तालाई उत्साह, जोस जाँगर प्रदान गर्ने बताए ।

त्यस्तै खुम्बु पासाङल्हामू गाउँपालिकाका अध्यक्ष मिङ्मा छिरी शेर्पाले पासाङल्हामू शेर्पाको कदरका लागि गाउँपालिकामा सङ्ग्रहालय बनाउन लागेको बताए । उनको नाममा विभिन्न कोषहरूको स्थापना गरी आवश्यक परेकाहरूलाई सहयोग गर्नेतिर पनि गाउँपालिकाले योजना बनाइरहेको बताए ।

पासाङ ल्हामु शेर्पा सर्वोच्च शिखर सगरमाथा आरोहण गर्ने प्रथम नेपाली महिला हुन् । उनले २०५० साल वैशाख १० गते सगरमाथाको सफल आरोहण गरेकी थिइन् । त्यो भन्दा पहिला तीन पटकसम्म सगरमाथा चढ्ने प्रयास असफल भयाको थियो । सगरमाथाको शिखरबाट श्रीमान् सोनाम छिरिङसँग फर्कने क्रममा उनको निधन भएको थियो ।

• संसद विघटन