काठमाडौं । मिटरब्याजीपीडितहरुको एउटा पक्ष अहिले पनि आन्दोलनमा छ । एक समूहले सरकारसँग सम्झौता नै गरेर आन्दोलनका सबै कार्यक्रम स्थगित गरिसकेको अवस्थामा अर्को समूह आन्दोलनमा छ । यहि आन्दोलन कम्युनिष्ट सरकारविरुद्ध हुन सक्ने भन्दै आवाज उठ्न थालेको छ ।
तराईका जिल्लाहरुमा साहुमहाजनले मिटरब्याजमा पैसा लगाउने ऋणीलाई सुकुम्बासी नै बनाउने गरेको विषय सार्वजनिक हुँदै आएको छ ।
मिटरब्याजीहरुको पीडा सहन नसक्दा काठमाडौं केन्द्रित भएका पीडितहरुको समस्या समाधान गर्न भन्दै सरकारले पाँच बुँदे सम्झौता नै गरिसकेको छ ।
मिटरब्याजसम्बन्धि छानविन गर्न आयोग बनाउनेदेखि मिटरब्याजलाई अपराध मान्ने गरि भएको सम्झौतामा असहमति जनाउदै आन्दोलनमा उत्रिएको समूहमाथि गम्भीर आरोप लागेको छ ।
नेकपा एकीकृत समाजवादीका अध्यक्ष माधव नेपालले कम्युनिष्ट सरकार कतिपयलाई नपचेको बताएका छन् ।
नेकपा माओवादी केन्द्रका अध्यक्ष पुष्पकमल दाहाल प्रचण्डको नेतृत्वमा बनेको कम्युनिष्ट सरकार कतिपयलाई अपाच्य भएको नेपालको भनाई छ ।
सरकारसँग सहमति भइसकेपछि पनि मिटरब्याजीहरु आन्दोलनमा उत्रिरहेको भन्दै उनीहरुलाई परिचालन गरी षड्यन्त्र रचिएको हुनसक्ने आरोप समेत लगाए ।
नेपालले कम्युनिष्ट सरकारबिरुद्ध षड्यन्त्र रच्ने काम भइरहेको भन्दै सजग रहनुपर्ने जिकिर गरेका छन् ।
यस्तै, उपप्रधान एवं गृहमन्त्री तथा नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले कम्युनिष्ट पार्टीलाई कमजोर पार्ने षडयन्त्र भइरहेको र यसलाई बचाएर जानुको विकल्प नभएको उल्लख गरे ।
कम्युनिष्ट पार्टीहरुमा वैचारिक सांस्कृतिक समस्या बढ्दै गएको भन्दै श्रेष्ठले रुपान्तरणको अभियान सञ्चालनको आवश्यकता औल्याए ।
नेताहरुले कम्युनिष्ट आन्दोलनमा समस्या रहेको र सबै मिलेर अघि बढ्नुपर्ने बताइरहेका छन् ।
अझं कम्युनिष्ट सरकारमाथि नै षडयन्त्र हुन थालेको आशंका समेत नेताहरुले गर्न थालेका छन् ।
मिटरब्याजीपीडितहरुको आन्दोलनलाई सरकारले सम्बोधनलागि गरेको वार्ता र सहमतिलाई अर्को पक्षले नमान्ने बताउदै अर्को वार्ता गरेपनि उनीहरुले त्यो वार्तालाई भंग भएको घोषणा गरेर आन्दोलन गरिरहेका छन् ।
पीडितहरु समेत सडकमा उत्रिएका छन् । तर, सरकारले यो विषय समाधान गर्न के कस्ता कदम चालिरहेको छ भन्ने विषय भने प्रष्ट हुन नसक्दा यस्ता आन्दोलन र आरोप–प्रत्यारोप चलिनै रहने देखिन्छ ।
