अमेरिकी सभामुखलाई आफ्नै पार्टीका सांसदले पनि दिएनन् मत
साझा परिवेश
बुधबार, अशोज १७, २०८० १२:४५
सभामुखले गुमाएको विश्वासको मतमा केभिन म्याकार्थी पदमुक्त भए
म्याकार्थीलाई हटाउन उनकै पार्टीका सांसदले मतदान गरे
सभामुख म्याकार्थीलाई हटाउनका निम्ति सदनमा प्रस्ताव अघि सारे
संसदीय दलका नेताका रुपमा को आउँछ भन्ने स्पष्ट छैन
काठमाडौं ।।
अमेरिकामा पहिलो पटक सभामुखले गुमाएको विश्वासको मतमा केभिन म्याकार्थी पदमुक्त भएका छन् । अमेरिकी सरकारको तल्लो सदनमा रिपब्लिकन पार्टीको संसदीय दलका नेताका रुपमा रहेका म्याकार्थीलाई हटाउन उनकै पार्टीका सांसदले मतदान गरेका हुन् । मंगलबार साँझ भएको मतदानमा उनलाई हटाउने पक्षमा २१६ मत परेका थिए भने, उनको पक्षमा २१० मत परेको हो ।
सोमबार फ्लोरिडाका सांसद म्याट गेट्जले सभामुख म्याकार्थीलाई हटाउनका निम्ति सदनमा प्रस्ताव अघि सारेका थिए ।डेमोर्क्याटहरुसँग मिलेर सरकारी खर्च जुटाउन एक विधेयक पारित गरेपछि रिपब्लिकनभित्र सभामुख म्याकार्थीप्रति असन्तुष्टि बढेको थियो । गेट्जले म्याकार्थीलाई ह्वाइट हाउससँग गोप्य सम्झौता गरी युक्रेनका लागि सहायता जारी राखेको आरोपसमेत लगाएका थिए । अब, म्याकार्थीको ठाउँमा रिपब्लिकनहरुको संसदीय दलका नेताका रुपमा को आउँछ भन्ने स्पष्ट छैन ।
