महोत्तरीबाट बेपत्ता पाँच किशोरी प्रहरीकाे सम्पर्कमा, घर फर्किन नमानेपछि मेयरलाई बुझाउने तयारी
साझा परिवेश
बिहिबार, कार्तिक २३, २०८० ११:१२
महोत्तरीको औरहीबाट बेपत्ता भनिएका ५ जना किशोरी भेटिएका छन् । गत दुई दिनदेखि सम्पर्कविहीन भएका उनीहरू केहीबेर अघि ढल्केबरबाट प्रहरीको सम्पर्कमा आएका हुन् ।
बाहिर जान लागेका उनीहरुलाई स्थानीयले रोकेर प्रहरीको जिम्मा लगाएका छन् । परिवारबाट यातना दिएको हुनाले घर छाडेर हिँडेको उनीहरुले बताएका छन् ।
सम्पर्कमा आए पनि घर फर्कन भने अस्वीकार गरेको प्रहरीले जनाएको छ । `उनीहरु घर फर्कन चाहेका छैनन, हामी मेयरका घरमा जान्छौ भनेका छन्,´ किशोरीहरुलाई उद्धृत गर्दै गौशाला प्रहरी प्रमुख मनोज यादवले भने ।
घरबाट किन यातना दिएको थियो भन्ने अझै खुल्न सकेको छैन । प्रहरीले यस विषयमा पनि थप अनुसन्धान गरिरहेको प्रमुख यादवले जानकारी दिए ।
किशोरीहरुले घर नफर्किने अडान लिएपछि प्रहरीले नगरको जिम्मा लगाउने तयारी गरेको छ ।
घर छाडेर हिँड्ने किशोरीहरुमा महोत्तरीको औरही नगरपालिका–२ की १५ वर्षे राजन सदा, १६ वर्षीया बसन्ती सदा, प्रतिमा सदा, १८ वर्षकी संगीता सदा र २० वर्षीया रूवी सदा हुन् ।
