शिक्षा, विज्ञान तथा प्रविधिमन्त्री अशोककुमार राईको
अस्पतालमा कानको जटिल शल्यक्रिया
अहिले भीआईपी क्याबिन ६०१ मा राखियो
काठमाडौं ।।
शिक्षा, विज्ञान तथा प्रविधिमन्त्री अशोककुमार राईको आज त्रिवि शिक्षण अस्पतालमा कानको जटिल शल्यक्रिया गरिएको छ । बायाँ कानमा समस्या भएका राईको सोमबार शल्यक्रिया गरी कोक्लियर इम्प्लान्ट गरिएको अस्पतालले जनाएको छ । “उहाँको कोक्लियर इम्प्लान्ट गरिएको हो, अहिले भीआईपी क्याबिन ६०१ मा हुनुहुन्छ । स्वास्थ्य अवस्था सामान्य छ,” अस्पतालका निमित्त प्रशासन प्रमुख प्रमोदकुमार निरौलाले भने ।
६६ वर्षीय मन्त्री राईको बायाँ कानमा लामो समयदेखि पाक्ने, पिप जम्ने, संक्रमण भइरहने समस्या थियो । जसकारण उनको श्रवण शक्ति पूर्ण रुपमा बन्द थियो । सोमबार शिक्षण अस्पतालमा उनको ‘सबटोटल प्रेट्रोसेक्टोमी विथ कक्लिअर इम्प्लान्ट’ गरिएको अस्पतालले जनाएको छ । कक्लियर इम्प्लान्ट कानको श्रवणशक्ति फर्काउनका लागि राखिने एक प्रकारको विद्युतीय डिभाइस हो । श्रवणसम्बन्धी गम्भीर समस्या भएका व्यक्तिहरुका लागि यो प्रभावकारी उपचार विधि मानिन्छ ।
