सांसद पदबाट निलम्बित भएका र पार्टीको जिम्मेवारीबाट अलग रहेका राष्ट्रिय स्वतन्त्र पार्टीका सभापति रवि लामिछाने अब पार्टीको जिम्मेवारीमा फर्किने भएका छन् । सहकारी ठगी प्रकरणमा सम्पत्ति शुद्धीकरणको समेत मुद्दा परेपछि उनि सांसद पदबाट निलम्बित मात्र नभई पार्टीको जिम्मेवारीबाट अलग रहेक थिए । गत कात्तिक पहिलो साता काठमाडौंमा पक्राउ परेसँगै लामिछाने पार्टीका गतिविधिबाट टाढा थिए । जिल्ला अदालत पोखरामा सम्पत्ति शुद्धीकरण कसुरमा समेत मुद्दा दायर भएपछि उनी सांसदबाट पनि निलम्बित अवस्थामा छन् । डीपी अर्याललाई पार्टीको कार्यवाहक सभापति र विराजभक्त महर्जनलाई कार्यवाहक संसदीय दलको नेता बनेका थिए । तर अब लामिछानेलाई जिम्मेवारीमा फर्काउने तयारी भएको पार्टीका कार्यवाहक महामन्त्री कवीन्द्र बुर्लाकोटीले जानकारी दिए । उनका अनुसार सोमबार पार्टीका दुईवटा विशेष केन्द्रीय कार्यसमिति बैठक बस्नेछन् । पहिलो बैठक डीपी अर्यालको अध्यक्षतामा बस्नेछ र लामिछानेलाई जिम्मेवारीमा फर्काउने निर्णय गर्नेछ । त्यसपछि लामिछानेको अध्यक्षतामा अर्को बैठक बस्नेछ ।
