विराटनगर । विराटनगर–१७ स्थित नेपाल–भारत सीमा क्षेत्र दशगजामा पर्ने चारवटा मदिरा पसल बन्द गर्न वडा कार्यालयले व्यवसायीलाई निर्देशन दिएको छ । स्थानीयको माग अनुसार विराटनगर–१७ का वडाअध्यक्ष समिम कमरले दशगजा क्षेत्रमा रहेका मदिरा पसल आगामी पुस ५ गतेदेखि बन्द गर्न निर्देशन दिनु भएको हो ।
वडा कार्यपालिकाको मङ्सिर २० गते बसेको बैठकले विराटनगर–१७ को राइसमिल टोल, मर्टेवा टोलको पश्चिम नेपाल–भारत दशगजा क्षेत्र तथा प्रहरी पोष्ट पूर्व २०० मिटर दुरीमा पर्ने मदिरा पसल बन्द गर्ने निर्णय गरिएको थियो ।
दशगजा क्षेत्रमा सोमराज बैठा, धिरज साह, कमल साह र विपिन बैठाले मदिरा बिक्री पसल सञ्चालन गर्दै आएका छन् । भारतको बिहारमा मदिरामा कडाई गरिएपछि नेपालतर्फ सीमा क्षेत्रमा मदिरा पसल खोल्ने क्रम बढेको छ । जसका कारण साँझ परेपछि भारतीय नागरिकहरु खुल्ला सीमाबाट आउने र अपराध तथा सामाजिक विकृती बढ्ने चिन्ता बढेको भन्दै स्थानीयले तत्काल मदिरा पसल बन्द गराउन आग्रह गरेका थिए ।
स्थानीयले वडा अध्यक्षलाई ज्ञापनपत्र बुझाएर दशगजा क्षेत्रमा खुलेका होटलबाट सामाजिक सद्भावमा असर गरेको भन्दै बन्द गराउनका लागि माग गरेको केहिदिनमै वडा कार्यालयले पुस ५ गतेसम्मको समय सीमा तोकेर स्थान्तरणको विकल्प वा बन्द गर्नका लागि निर्देशन दिएको छ ।
