५ हजार धरौटी तिर्न नमानेपछि प्रचण्डविरुद्ध नाराबाजी गर्ने युवा जेल चलान
साझा परिवेश
सोमवार, चैत्र १३, २०७९ १४:१९
काठमाडौँ । धरौटी तिर्न नमानेपछि प्रधानमन्त्री पुष्पकमल दाहाल ‘प्रचण्ड’विरुद्ध नाराबाजी गर्ने ३ युवालाई जेल चलान गरिएको छ ।
यही चैत ७ गते बानेश्वरमा नेकपा माओवादी केन्द्रका अध्यक्षसमेत रहेका प्रधानमन्त्री दाहालविरुद्ध नाराबाजी गरेका सोलुखुम्बुका २३ वर्षीय उद्धव बस्नेत, बाग्लुङका ३० वर्षीय सोम शर्मा र बझाङका १८ वर्षीय विप्लव खड्कालाई प्रहरीले पक्राउ गरेको थियो।
पक्राउ परेका उनीहरूलाई जिल्ला प्रशासन कार्यालय काठमाडौँले अभद्र व्यवहारको कसुरमा ५ हजार धरौटीमा रिहा हुन आइतबार आदेश दिएको थियो।
प्रशासनले तोकेको ५ हजार धरौटी नतिर्ने अडान गरेपछि उनीहरूलाई आइतबार कारागार पठाइएको जिल्ला प्रहरी परिसर काठमाडौँका डीएसपी निरन्जनदत्त भट्टले जानकारी दिए।
