शंकास्पद ३३ हजार अमेरिकी डलर बोकेर क्रोएसिया र रोमानिया हिँडेका ११ जना त्रिभुवन विमानस्थलबाट बुधबार परेका छन्।
विमानस्थल सुरक्षा प्रमुख एसएसपी लालमणी आर्चायका अनुसार उनीहरू सवैजना भिजिट भिषामा विदेश जाँदै थिए। आवश्यक कागजपत्र सवै ठीकठाक नै थियो।
उनीहरू प्रत्येकले ३÷३ हजार अमेरिकी डलर बोकेका थिए। सुरक्षा चेकजाँचका क्रममा उक्त अमेरिकी डलरका विषयमा उनीहरूले जानकारी दिन सकेनन्। उनीहरूको पासपोर्टमासमेत डलरको विषयमा जानकारी गराइएको थिएन।
उनीहरू फ्लाइट दुबईको ५७६ नम्बरको उडानबाट दुबई जान लागेका थिए । उनीहरूको पासपोर्टमा डलरको विवरण उल्लेख थिएन। प्रहरी अनुसन्धानका क्रममा उनीहरू दुबईलाई ट्रान्जिट बनाइ रोमानिया र क्रोएसिया जान लागेको खुलेको छ। एसएसपी आर्चाय भन्छन्, ‘कागजात ठीकठाक भएपनि उनीहरूसँग भएको डलरको विवरण बैंकिङ च्यानलमा थिएन। उनीहरूको यात्रा शंकास्पद देखिएका कारण अनुसन्धानका लागि नियन्त्रणमा लिइएको हो।’
अनुसन्धानका क्रममा उनीहरूले उक्त रकम आफ्नै व्यक्तिगत प्रयोजनका लागि लैजान लागेको बताएका थिए। डलर साट्दा पासपोर्टमा नै बैंकले लगाउने संकेत थिएन। अमेरिकी डलरको स्रोतसमेत उनीहरूले खुलाउन सकेनन्।
पक्राउ पर्नेमा बागलुङका चन्द्रकान्त चालिसे, बुद्धवीर वाग्ले र पृथलाल घर्ती, काभ्रेका अर्जुनकुमार श्रेष्ठ, म्याग्दीका नरबहादुर गरबुजा र दिलकुमार पुन, रौतहटका लक्ष्मीप्रसाद चिमोरिया, नुवाकोटका टेकारे तामाङ र रामभक्त थापा, धनकुटाका मरिचमान लिम्बू र सोलुखुम्बुका दोर्जी तामाङ रहेका छन्।
ग्लोबल रिक्रूटमेन्ट मेनपावरबाट उनीहरू दुबई जाँदै थिए । बरामद रकम मेनपावर सञ्चालककै हुनसक्ने प्रहरीको प्रारम्भिक अनुसन्धानबाट देखिएको छ। थप अनुसन्धानका लागि उनीहरूलाई राजस्व कार्यालय हरिहरभवन पठाइएको छ।
