विराटनगर महानगरभित्र सार्वजनिकस्थलमा सूर्तीजन्य पदार्थ सेवनमा रोक लगाइने

मोरङ । विराटनगर महानगरपालिकाले सार्वजनिकस्थलमा सूर्तीजन्य पदार्थको सेवनमा रोक लगाउने भएको छ।

सोमबार पत्रकार कल्याण कोष मोरङद्वारा आयोजित पत्रकारिता पुरस्कार प्रदान कार्यक्रममा मेयर कोइरालाले नयाँ वर्ष २०८० को सुरुवातसँगै विराटनगरका सार्वजनिकस्थलमा खैनी, गुट्खा, चुरोटलगायतका सूर्तीजन्य पदार्थको सेवनमा कडाइ गर्ने बताएका हुन्।

‘वैशाख १ गतेबाट महानगरले सार्वजनिक स्थानमा पान, गुट्खा, खैनी, चुरोटको सेवनलाई बन्द गर्न लागेको छ। नगरवासीले महानगरलाई साथ दिनुहुनेछ भन्ने अपेक्षा छ। एउटा सभ्य नागरिकको परिचय दिँदै महानगरलाई सुन्दर बनाउनका लागि हातेमालोको आवश्यकता छ’, उनले भने।

महानगरको मुख्य बजारक्षेत्रमा पार्किङको विषयमा सबैले साथ दिएकाले पनि खुल्लारूपमा सूर्तीजन्य पदार्थको प्रयोग नगर्ने अपेक्षा मेयर कोइरालाको छ।

स्वच्छ विराटनगरको अपनत्व ग्रहण गर्नका लागि हामी सबैको ढृढ संकल्पसहित परस्पर सहयोग हुनु आवश्यक रहेको उनको भनाइ छ।

महानगरले मात्र सबै क्षेत्रमा काम गर्छु भन्ने हिसाबले सफलता मिल्न सहज नहुने हुँदा यसका लागि महानगरवासी आफैं सचेत भएर एकढिक्कासहित अघि बढ्नुपर्ने आवश्यकता मेयर कोइरालाले ‍औंल्याए।

सोही क्रममा कोषका अध्यक्ष प्रहलाद साहले महानगर बनाउने नगरवासीले साथ दिनुपर्नेमा जोड दिए।

कार्यक्रममा विराटनगरका पत्रकार विक्रम निरौला र उषा सरदारलाई नगदसहित सम्मान गरिएको थियो।

• संसद विघटन