सुनसरी । इटहरी उपमहानगरपालिकाको बाह्रौँ नगरसभामा विवादित कर्मचारी आचारसंहिता सम्बन्धी व्यवस्था गर्न बनेको विधेयक २०७९ अन्ततः सर्वसम्मतिबाट पारित भएको छ ।
तिन साता अघि उक्त विधेयकमा एमाले पक्षका जनप्रतिनिधिहरूले असन्तुष्टि जनाएपछि नगरसभा स्थगित भएको थियो । सोमवार पुनः बोलाइएको नगरसभामा उक्त विधेयक जस्ताको त्यस्तै पारित भएको हो ।
मेयर हेमकर्ण पौडेलका अनुसार असन्तुष्टि जनाएको कुनै पनि कुरालाई विना संशोधन सहज ढङ्गले पारित भएको हो । उक्त विधेयक सहित ७ वटा विधेयक पास गर्दै १२ औँ नगरसभा सम्पन्न भएको छ ।
नगरसभाले विनियोजन ऐन संशोधन विधेयक २०७९, इटहरी उप-महानगरपालिकाको केही ऐन संशोधन गर्न बनेको विधेयक २०७९, रात्रि बजार सञ्चालन सम्बन्धमा व्यवस्था गर्न बनेको विधेयक २०७९ र बजार अनुगमन सम्बन्धमा व्यवस्था गर्न बनेको विधेयक २०७९ पारित गरेको हो ।
यसैगरी नगर खेलकुद विकास सम्बन्धमा व्यवस्था गर्न बनेको विधेयक २०७९, कर्मचारी आचारसंहिता सम्बन्धमा व्यवस्था गर्न बनेको विधेयक २०७९ र शिक्षा सम्बन्धमा व्यवस्था गर्न बनेको विधेयक २०७९ पनि नगरसभाले पास गरेको छ ।
यसअघि फागुन २७ गतेदेखि सुरु भएको नगरसभा चैत ३ गते अनिश्चितकालिन समयका लागि स्थगित भएको थियो । कार्यपालिका बैठकमा द्विपक्षीय सहमति भएपछि सोमबार नगरसभा बोलाइएको हो ।
कर्मचारी सम्बन्धी विधेयकको विषयमा इटहरीमा क्रियाशील राजनीति दलको नेतृत्वबिच सहमतिका आधारमा चैत ३ गते नै नगरसभाबाट टुङ्ग्याउने सहमति भएको थियो ।
नगरसभा बिच एमालेका जनप्रतिनिधि हाजिर गरेर गएपछि मेयर पौडेलले अनिश्चितकाका लागि नगरसभा स्थगित भएको घोषणा गरेको थिए ।
लगत्तै उनले फेसबुकमा कर्मचारीलाई व्यवस्थापन गर्ने विधेयक पारित गर्ने कुरामा दलहरूबिच सहमति भए पनि नगरसभा स्थगित हुनुको कारण उल्लेख गरेका थिए ।
नगरसभा स्थगित भएको साता पछि एमाले पक्षले पनि पत्रकार सम्मेलन गरी मेयर पौडेलले एमालेमाथि गलत आरोप लगाएको बताएका थिए ।
