श्रीमानले गरे श्रीमतीमाथि खुकुरी प्रहार, अवस्था गम्भीर

बुधबार बिहान ३५ वर्षीय राजेश कार्कीले श्रीमती ३० वर्षीया सरिता कटवाल (कार्की) माथि धारिलो हतियार खुकुरी प्रहार गरेका हुन् ।

इलाका प्रहरी कार्यालय इटहरीका प्रहरी निरीक्षक भीमबहादुर खड्काका अनुसार बिहानको समयमा आपसी घरायसी विवादमा कार्कीले खुकुरी प्रहार गरेका हुन् ।

खुकुरी प्रहारबाट सरिताको टाउको र हातमा गम्भीर चोट लागेको छ ।

गम्भीर घाइते भएकी उनको धरानस्थित वीपी कोइराला स्वास्थ्य विज्ञान प्रतिष्ठानमा उपचारका लागि लगिएको खड्काले जानकारी दिए ।

‘धारिलो हतियार प्रहार गरेको सूचना पाएलगत्तै हामीले श्रीमानलाई नियन्णमा लिएका छौँ,’ प्रहरी निरीक्षक खड्काले टाकुरासँग भने, ‘घटनाबारे थप अनुसन्धान भइरहेको छ ।’

उनका अनुसार मोरङको सुन्दरहरैँचा निवासी कार्की दम्पत्ती मंगलबार साँझ तरहरामा आफन्तकहाँ आएका थिए ।

स्थानीयबासीका अनुसार तरहराको मुख्य राजमार्गमा पर्ने रुद्राक्ष पार्टी प्यालेस नजिकैको होटलमा आएका उनीहरू उक्त होटल साहुका आफन्त रहेको खुलेको छ ।

‘हिजो बेलुका मात्रै यहाँ आफन्त पर्नेकहाँ पाहुना आएका रहेछन्,’ एक प्रत्यक्षदर्शी महिलाले भनिन्, ‘कहाँबाट आए र कहाँका मान्छे हुन् भन्ने यकिन भएको छैन ।’

प्रहरीले घटनामा संलग्न कार्कीलाई नियन्त्रणमा लिएर आवश्यक अनुसन्धान सुरु गरेको जनाएको छ ।