काठमाडौं । नेकपा एकीकृत समाजवादीका अध्यक्ष माधवकुमार नेपालले प्रदेश – १ को नाम कोशी राखिएर ठिक भएको बताएका छन् ।
पूर्वप्रधानमन्त्रीसमेत रहेका अध्यक्ष नेपालले इटहरीमा आयोजित पत्रकार सम्मेलनमा कुरा गर्दै प्रदेशको नामाकरण भूगोलकै आधारामा राखिएर उचित भएको टिप्पणी गरे ।
उनले प्रदेशको नामाकरण सम्बन्धमा पार्टीको सचिवालयमासमेत छलफल गरेको र सो छलफलमा साझा पहिचान हुनुपर्छ भन्ने माग उठेको तर प्रदेश– १ को नाम पनि भूगोल अनुसार हुनु सकारात्मक बताए ।
‘जातीय द्वन्दमा जान रोकियो । यसले राम्रो सन्देश गएको छ,’ उनले भने, ‘यसमा हामी सन्तुष्ट नै छौँ।’
तर नेकपा एसकै प्रदेश सांसदहरुले भने कोशी प्रदेश आफूहरुलाई मान्य नहुने भन्दै प्रस्तावको विपक्षमा मतदान गरेका थिए ।
गत फागुन १७ गते प्रदेशसभाको बहुमत सदस्यबाट प्रदेश – १ को नाम कोशी पारित भएको थियो ।
यस प्रदेशका विभिन्न पहिचानवादी दल तथा जातिय संस्थाहरुले प्रदेशको नाम कोशी मान्य नहुने भन्दै आन्दोलन चर्कारहेका छन् ।
सो आन्दोलनका क्रममा एक आन्दोलनकारीको मृत्युसमेत भइसकेको छ ।
