दाङ । गोदधारा घोराही उपमहानगरपालिका वडा नं. ४ को पहाडी बस्ती हो । जुन बस्ती घोराही बजारदेखि करिब १० किलोमिटर दुरीमा अवस्थित छ । जहाँ करिब एक सय २० घरधुरीको बसोबास छ । खडेरी सुरु भएसँगै गोदधारामा खानेपानीको अभाव चुलिँदै गइरहेको छ ।
खडेरी सुरु भएसँगै गोदधारा बस्तीको पानीको धारामा पानी मुहान मात्रै होइन, बस्तीको मुहारमा खानेपानी अभावको पीडाले खुसी हराएको छ । गोदधारावासीका लागि खानेपानीको योजना मात्रै होइन, मन भरी पानी खाने सपना पनि वर्षौँदेखि अधुरै छ ।
गाउँमा खानेपानीको खडेरी सुरु भए सँगै सुक्न थालेपछि अहिले गोदधाराका स्थानीयहरू एक ग्रागी पानीका लागि घण्टौँ टाढाबाट धाउनुपर्ने बाध्यता स्थानीयको छ । गाउँमा खानेपानीको व्यवस्थित योजना निर्माणको अभावका कारण यो बाध्यता बर्सेनि खेप्नु परेको स्थानीय कमला मगरको भनाई छ ।
खानेपानी योजना निर्माणको अभावका कारण खडेरी सुरु भएसँगै उनीहरूलाई पानीको पीडा पोल्ने गरेको छ । उनले भनिन–‘ पुस्तौदेखि हो खडेरी सुरु भएपछि खानेपानीको पीडा झेल्न लागेको, तर अझै खानेपानी पीडा उस्तै छ ।’ जसका खडेरीमा बर्सेनि पानीको पीडाको आहालमा गाउँ डुब्ने गरेको छ । उनले भनिन्–‘ एक ग्रागीका पानीका राती भन्नु छैन, दिन भन्नु छैन । बालबच्चादेखि सबै पानी खोज्दै कहिले कता कहिले कता हिँड्नु परिरहेको छ ’ तर गाउँमा खानेपानी अभाव र पीडा अझै हटेको छैन ।
जसका कारण अझै उही दुर्गम पहाडलाई त्यही पीडाले सताइरहेको उनले बताउँछिन् । गाविस, नगर हुँदै अहिले उपमहानगरपालिकाबासी भए पनि गाउँमा खानेपानीको पीडा र दुःख टर्न नसक्दा अझै उपमहानगरभित्रको बस्ती उही पुरानै अवस्थामा रहेको छ । उनले थपिन– ‘उपमहानगर भएर के भयो र ? खानेपानीको दुःख उही पुरानै छ । ’
खडेरी सुरुभएसँगै खानेपानी अभावको पीडा दाङको पहाडी वस्तीका सदियो देखिको पीडा हो । खडेरी सुरु भयो की पहाडी बस्तीलाई खानेपानी अभावको चिन्ताले पनि पिरोल्न सुरु गर्छ । कतिपय पहाडी बस्तीमा खानेपानीको धारा पुगेपनि पानी पुगेका छैन ।
कतिपय बस्तीमा अझै खानेपानीको धारा पुग्नै बाँकी छ । खडेरी बढ्दै जाँदा पानीको मुहान सुक्न थालेपछि दाङको पहाडी बस्तीमा खानेपानीको अभाव दिनानुदिन चुलिँदै गइरहेको छ । खानेपानीको सहज व्यवस्थापन नहुँदा एकग्रागी पानीका लागि घण्टौँ टाढा धाउनुपर्ने दुविधा पहाडीबासीको वर्षाैंदेखिको पीडा हो ।
