वीरगञ्ज । प्रहरीले प्रतिबन्धित पौने ६ लाख बराबरको भारतीय नोटससिहत वीरगञ्जबाट दुई जनालाई पक्राउ गरेको छ। प्रहरीले नेपालमा प्रतिबन्धित रहेका रु.पाँच सय र दुई हजारको भारतीय नोटसहित दुई जनालाई पक्राउ गरेको हो।
पक्राउ पर्नेमा भारत उत्तर प्रदेश गोरखपुर ग्राम महुई सुघरपुर बस्ने विनोदकुमार गुप्ता र भारत विहार जिल्ला मोतीहारी ग्राम करमवा रघुनाथपुर अमितकुमार सिंह छन्। वडा प्रहरी कार्यालय विर्ता र प्रहरी चौकी ईनर्वाबाट खटिएको प्रहरी टोलीले वीरगञ्ज–१६ रजतजयन्ती चोकमा चेकजाँच गर्नेक्रममा गुप्तालाई प्रतिबन्धित भारतीय नोटसहित पक्राउ गरेको हो।
भारतबाट वीरगञ्जतर्फ आइरहेको उनको साथबाट भारतीय रू.५०० को दरको नोट–३६३ थान रु.२०० को नोट–१३ थान, रु.१०० दरको नोट–१४५ थान रू.५० दरको नोट–२८ थान गरी दुई लाख बरामद गरिएको प्रहरीले जनाएको छ। यस्तै, रजतजयन्ती चोकबाट नै सिंहलाई पनि चेकजाँच गर्ने क्रममा प्रहरीले पक्राउ गरेको हो।
भारतबाट आउँदै गरेका उनको साथबाट भारतीय प्रतिबन्धित नोट रु.२००० दरका नोट–२१ थान, रू.५०० दरको नोट–६४४ थान रू.२०० दरको नोट–३३ थान रु.१०० दरको नोट–४५ थान र रू.५० दरको नोट–१४ थान गरी तीन लाख ७५ हजार भारु बरामद गरिएको पर्साका डिएसपी निर्मल बुढाथोकीले जानकारी दिए।
पक्राउ परेका दुबै जनालाई आवश्यक कारवाहीको लागि राजश्व अनुसन्धान कार्यालय पथलैया, बारामा बुझाइएको बुढाथोकीले बताए।
