“कुनै दबाब वा अवाञ्छित प्रभावबाट सरकार प्रभावित हुँदैन” : उप्रधानमन्त्री
साझा परिवेश
बुधबार, जेष्ठ ३, २०८० १६:१९
काठमाडौं । उपप्रधान एवं गृहमन्त्री नारायणकाजी श्रेष्ठले नक्कली भूटानी शरणार्थी प्रकरणलाई तथ्य र प्रमाणका आधारमा निष्कर्षमा पुर्याउने बताएका छन् ।
बुधबार एकीकृत समाजवादीका नेता तथा कार्यकर्ताले नक्कली शरणार्थी प्रकरणको सत्यतथ्य छानबिन गरी दोषीउपर कारबाहीको माग राखेर बुझाएको ज्ञापनपत्र बुझ्दै उनले नक्कली भूटानी शरणार्थी बनाएर नेपाली नागरिकलाई बाहिर पठाउने र त्यसबाट पैसा संकलन गरी सम्पत्ति आर्जन गर्नु संगठित अपराध भएको बताए ।
यो अपराधमा संलग्न जो कोहीलाई पनि कारबाहीको दायरामा ल्याउने भन्दै उनले भने, ‘राज्यका उच्च तहमा बसेका व्यक्तित्वहरु र तलसम्मको सेट मिलाएर यो काम अघि बढाइएको छ, त्यसैले संगठित अपराध हो ।’
अनुसन्धान अधिकारीले अपराधको प्रकृतिलाई निश्चित गरिसकेपछि प्रक्रिया अघि बढाउने उनले बताए ।
निर्दोष नफसोस्, दोषी उम्किनु हुँदैन भन्ने निर्देशन दिएको भन्दै उपप्रधान तथा गृहमन्त्री श्रेष्ठले भने, ‘कुनै दबाब वा अवाञ्छित प्रभावबाट सरकार प्रभावित हुँदैन, अनुसन्धानको प्रक्रियालाई तथ्य र प्रमाणको आधारमा निस्कर्षमा पुर्सयाउन सरकार प्रतिवद्ध छ । दोषीलाई कारबाहीको प्रक्रियामा लगि छोड्छौं ।’
